routines maman

اكيد كل وحدة قربت تولد راهي تخمم شا تدي معاها كي تروح تولد و خايفة تكثر او تنسى حاجات مهمة، لهدا حاولت نبسطلك الامور و نمدلك نصائح حسب تجربتي، نتمنى نفيدكم قد ما نقدر✨

نصائح يمكنكِ اتباعها خلال آخر شهر من الحمل أكيد بعد التأكد من خلال الفحص✨💜
و رجاءا اخطيونا مالوصفات اللي يحفزو الولادة لانو رح يضروكم انتن و الجنين ايضا✨

ننصحك اختي انك مش غير فهاد المواضيع، في كل امر مهم فحياتك احكمي ورقة وستيلو و كتبي شا راكي باغية هكا رح تتنظم الافكار فراسك و الامور تسهل عليك🥰💜✨

فترة االفصل الأخير من الحمل من 3إلى9 أشهر✨

السلام عليكم ورحمة الله تعالى وبركاته.
ها أنا رجعت باش نكملو الموضوع السابق بإذن الله ، أولا ربي يعافي كل وحدة من هاد الأمراض، و اللي راهي مريضة ربي يشافيها و يفكها على خير إن شاء الله.
_إذا الأمراض اللي ممكن تصيب المرأة أثناء فترة الحمل هي أمراض شائعة ألا و هي:
_ارتفاع ضغط الدم_ La tension _
_تضخم الغدة الدرقية_Le goitre _
_سكري الحمل_Le diabète de grossesse _
_أولا بالنسبة ل_la tension _ لاازم تبعي عند الأخصائية نتاعك لأنو هاد الأمراض يؤدوا إلى العملية القيصرية، فهي راح توجهك وتعطيك ريجيم فيه وش لازملك تاكلي ووش متاكليش، و أنا من الآن نوصيكم اخطييكم من الملح.
_ثانيا_ le goitre_ فهي أيضا نفس الشيء الأخصائية رح تعطيك علاج، فاحذري أنك تهمليه أو تنسايه، لهاد الشي قلتلكم تبعو التحاليل لأنو انتي قادرة ميكون فيك أي مرض من هاد الأمراض و في فترة الحمل لا سمح الله يجيك. ثالثا: _le diabète de grossesse _ هاد المرض يصيب من 2_10 في المئة من النساء .
_النساء المعرضات لسكري الحمل:
_النساء اللواتي يحملن فوق 35 سنة.
_النساء ذات السمنة الفرطة.
_النساء اللواتي أصبن بهاد المرض في أول حمل ليهم.
_الوراثي《مصاب به أحد من العائلة 》.
_الإحتياطات اللازمة: يجب عمل التحاليل كل شهر《قبل كل تحليل لازم تصومي 12 ساعة 》. _لاااازم الحفاظ لأنو في أغلب الحالات يمكن اللجوء إلى الإنسيولين 《أثناء فترة الحمل فقط》.
_عدم التعصب_الخلعة_........
_《بعض النساء يطبن بعد الولادة و البعض لا يشفون، كذلك نسبة من النساء اللواتي أصبن بسكري الحمل معرضات للسكري العادي في الكبر, و نصيحة أخرى، لااازم تبعي تحاليل مرض السكري بعد الولادة عالأقل لمدة شهر لأنو إدا متبعتيش يمكن تبقاي مريضة بيه حياتك كاملة لا سمح الله، و الوقاية خير من العلاج》.
_ إذا كان هذا هو كل شيء بالنسبة لموضوع اليوم نتمنى من أعمااااق القلب أني نكون فدتكم و لو بالقليل دمتم سالمات يا أحلي بنات 🥰💖🌹

السلام عليكم ورحمة الله تعالى و بركاته.
اليوم إن شاء الله رانا رايحين نتكلمو على المرحلة الثانية من الحمل و التي تكون من 3_6أشهر: و التي هي فترة ما بعد الوحم بسم الله على على بركة الله .
_ أولا لازم تنظمي أكلك و تاكلي أكل صحي جدا لأانو فهاد الفترة النمو نتاع الجنين يزيد بسرعة، فكثري من الخضر و الفواكه و الأسماك ووطبعا اذا تشهيتي حاجات أخرين فبصححححتك، ثانيا إياك تهملي التحاليل و المعاينات الطبية، كاين الكثير من الأزواج اللي يهملو هاد الشيء و من بعد لا سمح الله إذا صرات حاجة يلومو الأطباء فهاد الشيء خطأ كبير يوقعو فيه الكثير من الأزواج، و كاين اللي يقولك بكري والدينا مكانوش يديرو هاك، إيه صح لكن هاد الوقت مش كيما وقتهم هوما،ضغط الدم و السكري راهم أمراض العصر فاحذرو أخواتي، ثانيا: استمتعي بهاد 3أشهر الوسطى لأنو 3أشهر الأولى يفوتو غير مرض و رقاد، و الثلاث الأواخر رح تكوني ثقييلة فيهم، لذلك استمتعي فهاد 3أشهر و استغلي الأوقات اللي يتحرك فيها الجنين و اشبعي من هاد المرحلة، و طبعا منهملوش رواحنا، داائما تألقي، تألقي مهما كانت الظروف أو المشكل داائما تألقي يا حبيبتي لأنك تستاهلي الأفضل 🌹، لا من ناحية النظافة أو اللبس أو الزينة، كوني أجمل إمرأة حامل، تصوري صور جميلة باش تبقى ذكرى، خلي دائما غرفتك و بيتك نظاف و منظمين...، و لما تروحي للمعاينات استمتعي بسماع دقات قلب الجنين صدقيني هاد الأشياء رح تنشطك بطريقة خيالية، عموما مع الشهر الخامس إلى السادس يظهر جنس الجنين، لما يبان جنس الجنين و تتأكدي 100% ابداي تجهزيلو الملابس《رح نتكلمو عليهم في المواضيع القادمة بحول الله تعالى》 باش منطولش عليكم رح نحطلكم موضوع الأمراض اللي قادرة تجيك في فترة الحمل في المنشور الجاي، انتظروه بعد قليل. أستودعكم الله إلى اللقااء🥰💖🌹




🤰❤️

السلام عليكم ورحمة الله تعالى و بركاته.
بسم الله نكملو الموضوع السابق و نروحو لخطوة
_إعلان الحمل_
الأكثرية نتاع الأزواج غير تخرج نتائج الحمل يعيطو تم تم يبشرو العائلة باش يفرحوهم، كل واحد و حر في نفسو، لكن نصيحتي ليكم متتقلقوش على إعلان الخبر، لأنوا أولا العين عليكم و《العين حق و الطيرة باطلة》،و أيضا الإنسان في هاد الوقت ميقدرش يعرف اللي يحبوا ماللي يحسدو راكم فاهمينني، و ثانيا كيما علابالكم في 3أشهر الأولى يكون كاين خطر الإجهاض، لذلك لا سمح الله و صرات حاجة راح تنضري نفسيا و جسديا، و راح تجيك صعيييبة بزااف أنك كاامل الناس اللي خبرتيهم راح تعاودي تقوليلهم بأنك أجهضت لا سمح الله، علا هاد الشي قلتلكم متتقلقوش على الأقل بعد ما تفوت هاد المرحلة الأولى من الحمل، و طبعا هادي نصيحة فقط و في الأخير كل كوبل حر في إتخاذ قراراتو.
_نقطة أخرى نسيت مهدرتلكمش عليها في بداية الموضوع و اللي هي نقطة مهمة جدااااا ألا و هي الحفاااظ على صحتك إن كان في فترة الحمل ولا لا، فيا أختي إذا كنتي مالناس اللي يموووتو على القضيان و النفيظ فغيير قللي من هاد الشي، الجر ممنوع منعا باتااا تجري أشياء ثقيلة، كذلك ممنوع ترفدي أشياء ثقيلة، الدرج إياك ثم إياك و الجري فالدروج فهاد الشي خطيير جدااا، أيضا حمل الزرابي... صدقوني غير هاد الشي خطير جداا.
كان هادا كلشي بالنسبة للمرحلة الأولى من الحمل نتمنى أني نكون فدتكم و لو بالقليل بااااي.🥰🌹💖

_السلام عليكم ورحمة الله تعالى وبركاته,
_الموضوع 2 الثاااانيي موضوعنا لليوم هو موضوع _الحمل_ نبداو على بركة الله🥰. أولا لازم نعرفو بأنو الحمل فيه ثلاث مراحل المرحلة الأولى تكون من بداية الحمل إلى الثلاث أشهر الأولى 0_3
المرحلة الثانية تكون من 3_6أشهر و المرحلة الأخيرة من 6_9أشهر اليوم راح نتكلمو على أول مرحلة و المراحل الأخرى في منشورات أخرى بحول الله تعالى.
_المرحلة الأولى: أولا باش تعرفي إذا كنتي حامل لازملك ديري test، 《جهاز كشف الحمل 》طبعا إذا كنتي حامل رح يخرجلك 2 خطوط أو تروحي للمختبر و تطلبي عمل تحليل الدم، إذا كانت النتيجة إيجابية لازم تروحي عند أخصائية باش تعاينك و هي رح تعطيك التحاليل اللازمة، بالنسبة للفيتامينات إذا كانت حاجة ناقصة اكيد رح توصفلك،《كاين اللي الميزانية متسمحلهاش باش تحط من 2000da و روح كل مرة على هاد الفيتامينات فنقولك أختي إذا مكانش عندك نقص كبير تقدري تعدلي هذاك النقص بالخضر و الفواكه و الأسماك... غير باش تتفادي المصاريف فقط و في الأخير كل واحد و الميزانية نتاعو》 و حتى ولو شربتي فيتامينات متتكليش غير عليهم جربي تاكلي أكل مفيد و خطييييك من أكل المطاعم ❌❌❌
كولي الأسماك لأنها غنية بحمض الفوليك و اللي هو ضروري في هاد الفترة و احذري من اللحم اللي مش طايب مليح، و بالطبع فيها شوية معانات لكن صدقيني بعد هادي 3أشهر الأولى راح تنساي كللشي، مثلا الدوخة، النعااااس😂😂، حشاكم القيئ، خصوصا مع الصباح، لكن إياك تقطعي الماكلة لأنو هي أهم حاجة باش متفشليش كل ما تردي حاولي تعوضي، و كاين اللي تولي متحملش ريحة الأكل، أو الطبخ نتاع شخص معين هادا شيء عاادي جداااا، لكن الحاجة الوحيدة اللي ننصحك بيها أختي العزيزة متبقايش دايرة في راسك هاد الأشياء جربي تنساي بأنك راكي تتوحمي، هكذا تتفاداي بعض المشاكل، مثلا كاين اللي تتخاصم مع زوجها أو أهلها، و ينوضو مشاكل على حاجة تافهة، لذلك حاولي تنسي روحك، اقراي كتب اتفرجي أفلام لكن اخطينا من سلاحف النينجا و أفلام الرعب و الكائنات الفضائية😂😂😂، اعملي مكياج اخرجي تنفسي هواء نقي المهم أنو ديري الحاجة اللي تبغيها، المهم علابالي طولت عليكم شوية الله غالب أنا وعدت نفسي أني نشارك كل تجربتي و اللي نعرفها تفيدكم نشارككم بيها، la suite تاع المرحلة الأولى تلقاوها في المنشور الجاي ان شاء الله بااااي 🥰🌹💖

مرحبااا 💖
إذا نكملوا الموضوع السابق و اللي هو《التخطيط للحمل》
بسم الله على بركة الله الخطوة الرابعة و اللي هي آخر نقطة و هي: تنظيم وقت الحمل: بمعنى إذا كنتي من النساء اللي ميحبوش فترة《النفاس》تكون في شهر رمضان لازم تديري حسابك مالأول، و طبعا في النتيجة هاد الأمور بيد الله، باش ماتبقايش من بعد لاهية في التربية و الصيام من جهة أخرى، فإذا صمتي رمضان أثناء فترة الحمل احرصي على أنو تاكلي مليح و كولي أكلات صحية مثل الخضار... لكن مش لدرجة أنك تاكلي على إثنين و كثري مالفواكه و في الصحور كلي أيضا فواكه كالتمر مشمش... باش ماتفشليش في النهار و حاولي متعبيش روحك بزاف خصوصا إذا كنتي في الأشهر الأولى من الحمل أما إذا كنتي بعد أول أسبوع من الشهر التاسع فغير تمشي و جففي 😂لأنو هاد الشي راح يساعدك من بعد، كاين اللي بالعكس تقولك أنا نقدر نعاود نخلف الصيام عادي فأنت حرة يا أختي، و بالطبع كاين بعض النساء ميقدروش للصيام أثناء فترة الحمل و يواجهوا بعض الأمراض منها 《سكري الحمل...》اللي راح نتكلموا عليه في المواضيع الجاية بحول الله تعالى، المهم هادا كان كلشي بالنسبة لموضوع اليوم نتمنى من أعماق قلبي أني نكون فدتكم ولو بالقليل، ترقبوا المواضيع القادمة إن شاء الله تعالى، أستودعكم و إلى اللقاء في موضوع آخر، متنساوش تخلولي تعليقاتكم و آرائكم في الأسفل، بااااي🥰🥰🥰🌹🌹🌹.

_سلام،
أول موضوع و اللي هو 《التخطيط للحمل》، اللي تحتاج نتكلم في أي موضوع يهمها تبعثلي .
بسم الله نبداو على بركة الله،
1: أول حاجة خصها تكون هي الرضا و التفاهم بينك و بين زوجك، لازم تتفاهمو من بداية زواجكم على أمر الإنجاب، كاين اللي يحبو يسافرو و يعيشو حياتهم و يحققوا أحلامهم....، و منبعد يفكروا في هاد القرار و كاين اللي يفكروا في العكس المهم كل كوبل و طريقة تفكيره و كل كوبل و الحالة الإجتماعية تاعه، لكن المهم أنو ما تخلوا أي واحد يقرر في بلاصتكم، هادي حياتكم و نتوما حرين فيها .
2: لاازم أنت و الزوج نتاعك تكونوا فاهميين ملييح مليح أهمية هاد الخطوة و جديتها، كاين الكثير من الأزواج اللي يتقلقوا على الأولاد و من بعد تجيهم صعيبة، لأنو من بعد راح يكون فيه مسؤولية كبيرة، راح يكون فيه توتر، تعب و إرهاق، مصاريف........، بمعنى أنو حياتكم راح تتغير °180 درجة، إذا كنتو عارفين هاد الأمور و خديتوا هاد القرار مع بعض، و مقتنعين بيه، نروحو الآن للخطوة الثالثة.
3: و اللي هي الوقاية والعلاج: أولا إذا كنتي تعاني من أي مرض 《كالأنيميا》 لااازم عليك تعالجيه قبل فترة الحمل لأنو أي دواء مش مليح فهاد الفترة لأنو قادر يلحق الضرر بالجنين، و في فترة الحمل راكي قادرة تعاني من نقص الحديد في الدم فهاد الشي عادي جدا لما تعملي التحاليل و يكون عندك الحديد ناقص فالطبيب رح يوصفلك فيتامينات خااصة .

ثانيا: و نركز ملييح على هاد النقطة المهمة: إذا كان زوجك مدمن على أي حاجة مثلا《التدخين....》 لاااازم يحبس نهائيا، لأنو راح يضرك في صحتك و يضر الجنين لأنك اللي تستنشقيها تروحلو و في المستقبل راح يضر الطفل، و أصلا هاد الشي فيه منفعة لصحته هو تاني، لذلك ابذلي كل جهدك في إقناع زوجك قبل ما تخطي هاد الخطوة المهمة.🌹
الخطوة الرابعة في المنشور الجاي .🥰