Be Slim Be Active

قال تعالى :
(ويسقون فيها كأسا كان مزاجها زنجبيلا)
وده يدل على الفؤاد العظيمه للزنجبيل
أصلا اللي بنستعمله منه هو جذوره وسيقانه
بيحتوي على ماده الgingerols ومواد طياره وفلافينويد وعلى مايقارب من ٤٠ ماده مضاده للأكسده
بيعالج وبيقي من حاجات كتير جدا شوف معايا حضرتك :
_يقاوم الخلايا السرطانيه ويحد من انتشارها
_يعالج الصداع وألام الرأس لأنه بينشط الدوره الدمويه
_يقوي الذاكره
_يقوي النظر ويعالج الغشاوه
_يعالج احتقان الأحبال الصوتيه
_يعالج الدوخه والدوار
_يقلل التوتر والقلق
_منشط طبيعي يزيد من طاقه الأنسان
_يسكن ألام القولون
_موسع للشعب الهوائيه
_لأنه مضاد للألتهاب قوي يعالج أيضا العظام والآلام الروماتزميه
_يقلل نسبه الكوليسترول في الدم
_يقوي جهاز المناعه
_الزنجبيل يساعد على امتصاص الدهون خاصه دهون البطن وبالتالي مهم في نظام الرجيم
_مفيد أيضا للبشره يمكنك إضافه زيت الزنجبيل إلى الماء الذي تستحم به فيساعد على نضاره البشره
_ويقلل من ألام الطمث
وده كانت أهم الفوائد ليه
عود نفسك تشرب كوب من الزنجبيل في اليوم بأذن الله هيقيك من حاجات كتير جدا.
دمتم بصحه ♥
الدكتوره ساره

مالك ضعفان ليه هُما بياكلوا أكلك .. الجملة دي إتقالت لـ واحد من كل بيت في العالم على الأقل ..

فقر الدم (الأنيميا) بيجي لأسباب كتير مش بس عشان مفيش حديد .. وممكن بعد ما تتعالج يرجع تاني ..
لو أنت ماقعدتش ٣ شهور على الأقل في علاج صحيح بشكل مستمر ومنظم وقبلهم تكون متشخص صح ومعالج سوء الإمتصاص يبقى طبيعي يرجعلك تاني وتلاقي نفسك لسه تعبان ..

الهيموجلوبين بيقل عشان الحديد ناقص في جسمك عشان مفيش توليد كافي لكرات الدم الحمراء في الجسم .. ومهم يكون بنسبة ١٤ غم/١٠٠ مل على الأقل .. وفي الأغلب الستات هما أكثر عُرضه له .. ودة هتعرفه عن طريق إلتهاب وشحوب في الفم واللسان والأظافر والضعف العام .. بس مش هو دة بس السبب ..
ممكن فقد الدم بسبب النزف الهضمي .. بمعنى ( البواسير / قرحة المعدة والاثنى عشر / المعالجة بالأسبرين كتير / دوالي المرئ / الديدان ) .. كل دول ممكن يبقوا سبب ..
ولو جالك أكثر من عرضين من دول ممكن يبقى سبب : الشحوب وسرعة التعب وضعف العضلات والصداع والدوار وطنين الأذن ..

علاجك هو تغذيتك ومعرفتك للسبب أولاً ومعالجة سوء الإمتصاص عشان العلاج والتغذية يجيبوا نتيجة ولو قولت أنا بقيت كويس من أول شهر تبقى بتكدب على نفسك ..

شير وفيد غيرك الموضوع أنتشر جداً مؤخراً ..
دمتم بصحة ♥️
الدكتوره ساره

الفيتامينات بتعالج على فكره
ف سلسلة الفيتامينات بتعالج على فكره هناخد فيتامين فيتامين ونتكلم عنه بإستفاضه النهاردة هنتكلم عن أول واحد فيتامين ألف أو فيتامين A .
عارف النكته دى :-
وقفتُ لأكل سندوتش كبده عند عم برعي بائع الكبده المتجول، وفجأة سألته: أوعى تكون بتأكلنا كبدة كلاب يا عم برعي؟ وأنا أقدر على سعر كبدة كلاب يا بيه؟ اللي يقدر عليه الناس اللى فاتحة على الكورنيش مثلًا، لكن أنا رجل على قد حالي!!! هكذا أجاب عم برعي على السؤال. نظرتُ إليه مندهشًا، ثم ابتسمت، وواصلتُ الأكل مِن الحيوان المجهول!!!!
أحب أطمنك وأقولك إن ده مستحيل بغض النظر عن الضحك والنكت إن البنى ادم لو أكل كبدة الكلاب سيموت على الفور من إرتفاع مستوى فيتامين ألف فى جسمه ودا أول شئ عاوزين نتعلمه سويا حتى الفيتامينات ليها حدود و جرعات أمنه وجرعة سامة مش معنى كونه فيتامين نفتح على الرابع ومنقلقش لا كل شئ ليه حدود .
طيب أيه الإستخدمات العلاجية لفيتامين ألف :-
١- ضعف الرؤية الليلية للناس اللى بتسوق بليل وبتشتكى من كده .
٢- يحميك من أشعة الشمس الضارة الناس اللى بتقف فى الشمس كتير .
٣- هوه المسئول ان الخلايا بتتكلم مع بعض لو حصل ونقص بيفقدو التواصل وممكن خلايا تقلب بسرطان .
٤- مهم جدا جدا لمن يعانون بمشاكل خاصة بالقلب والأوعية الدموية لأنه بيمنع التصلب .
٥- فعال جدا فى علاج حساسية الصدر أفتكر معايا مع التفاح .
فيتامين ألف موجود بكثرة فى الكبد زى الكبد البقرية و يستحسن إستهلاكه مع الدسم حتت سمنة بلدى قولنا معاك ملعقتين كبار يوميا حد أقصى ولا حتى زيت زيتون عشان يتم إمتصاصه .
شير لغيرك ناس كتير مبقتش بتشوف كويس بليل إنصحهم بسندوتشين كبده الفلاح و لا عز المنوفى ولا صبحى كابر ولا البرنس كل يوم كل واتعالج واستمتع ياعم .
دمتم بصحة ❤️
الدكتوره ساره

معسلة يا بطاطا .. ماحدش بيسمع الجملة دي إلا وريقُه بيجري ..
البطاطا الحلوة مش البطاطس نركز ..

واحدة منها في اليوم بس بتديك 400% من ڤيتامين أ .. يعني عيونك وجلدك بيتغذوا لما يشبعوا ..
وفيها بيتا كاروتين اللي هو مصدر لمضادات الأكسدة ..
وڤيتامين سي كمان للمناعة كـ نوع من أنواع التغيير بدل الحمضيات ..
بوتاسيوم يقللك ضغطك ويدعم الكالسيوم في عظامك ..
ألياف عشان مرضى السكري .. وكمان يشبعكوا أسرع ..
سعرات حرارية عالية بس كربوهيدرات قليلة ..
بيمتص الحديد كويس جداً جداً ..

البطاطا شتوية علاجية طعمها لذيذ ومحدش مابيحبهاش .. بعد كل وجبة غدا تحطلك كام واحدة في الفرن كدة وتسيبها شوية .. وبألف هنا وشفاء ..
اللي بيحشيها حاجة أو بيعملها بأي طريقة لذيذة يقولنا عليها في الكومنتات يا جماعة

شير وأعزموا بعض على بطاطا يا جماعة وحمص الشام ..
دمتم بصحة♥️
الدكتوره ساره

ياجماعة ورق الجوافة مش مفيد بس للكحة زى مانت متخيل دا ممتاز كمان عشان
١- الإسهال .
٢- النقرص .
٣- الكانديدا الرخمة اللى بتبيض اللسان وبتعمل إلتهابات نسائية وإفرازت مش لطيفة .
٤- بتطرد البلغم
٥- مخفض لسكر الدم لأنه بيقوى الكبد جدا .
أما الثمرة ذات نفسها ففيها قصة لا يعلمها الكثيرون فيتامين سى فيها أربع أضعاف البرتقال وبتديك ٢٣٠٪؜ من إحتياجك اليومى لو إستهلكت ١٠٠ جرام بمعنى إنه مينفعش حد أبدا عنده إنيميا إلا والجوافه لازفة فى أى أكله فيها حديد زى السبانخ زى الكبده زى التمر عشان إمتصاص الحديد بيكون ضعيف فى حالة عدم وجود فيتامين سى .
لو سمحت شير المعلومة وخلى عندك ورق الجوافه فى صيدلية بيتك المنزلية هتحتاجه فى الكحة والبلغم والإسهال
دمتم بصحه ♥
الدكتوره ساره

مش عارف أتمالك أعصابي .. الراعي الرسمي للشتاء .. ولأي وقت والله ..

ألتهاب الأعصاب بين فقدان الشعور بمنطقة معينة وبين إنك مش عارف تمسك أعصابك والحاجة بتوقع من إيدك لدرجة إنك بتحسس بشلل وتُقل ومش قادر تتحرك وكمان بتزيد ألم وكأن فيه حجر ..
دة طبعاً ممكن يسبب شلل الوجه وضعف القدرة وتعرق شديد وضغط مش مستقر ..

أسبابه الطبية كتير : إصابة موضعية أدت لتمزق أو تهتك أعصاب / تلف الأوعية الدموية المُتصلة بالأعصاب / التسمم بالرصاص / مرضى السكري / نقص حاد في نوع من الڤيتامينات في الجسم ..

ممكن نكتشف الأسباب عن طريق صورة دم توضح نسبة السكر ومستوى الڤيتامينات وإذا كنا مصابين بعدوى ولا لا ونسبة المعادن في الدم والكشف عن أمراض المناعة الذاتية ..

ومعاك الكركمين مضاد الألتهابات الجبار وتقدر تاخد معاه رقائق الخميرة ودي مقويه أصلاً للأعصاب والكورديسيبس دة يدّي قوة لو فيه عجز ويقوي المناعة ويحفز طاقة جسمك بالكامل ..

لكل داءً دواء .. دمتم بصحة ♥️
الدكتوره ساره

سامع ضجة وصوت صفارة محدش غيرك سامعها ..
لو كشفت أو لسه ماكشفتش .. وبيجيلك صداع وأرق وإكتئاب وعدم تركيز وتوتر وألم في الأذن .. أحسب لنفسك عندك كام حاجة من دول :
ضغط عصبي ونفسي طول الوقت ..
ولا
بتشتغل في مكان في ضجيج ودوشة بصورة مستمرة ..
ولا
مُدخن بطريقة مبالغ فيها ..
ولا
عندك فرط أو خمول الغدة الدرقية ..
ولا
ضغطك عالي ..
ولا
بتاخد مضادات ألتهابات ومضادات حيوية وأسبرين كتير ..
ولا
عندك فقر دم (أنيميا) ..
ولا
كشفت وطلع عندك حاجة من دول (كتلة دهنية مسببة إنسداد الشرايين القريبة من غشاء الأذن / تضرر عصب السمع / تراكم الشمع / مشاكل مفصل الفك) ..

شوف كدة طلعت نسبة قد إيه وحط تحتهم خط كبير إسمه "طنين الأذن" ..
تخيل دوشة جوا دماغك وجوا ودانك كمان ..
حل المشكلة دي بيتلخص في التورين والچنكو .. التورين يقوي الأعصاب والچنكو يسندك في التركيز .. وكفاية بقى تدخين وأسبرين الطبيعي مفيش أحسن منه .. عالج الطنين عشان للأسف مابيتسكنش ..

شير وساعد .. دمتم بصحة ♥️
الدكتوره ساره

٧ أسباب ممكن يؤدوا إلى قرحة المعدة ..
قبل ما أقولك أسبابها .. هي مرض بيحصل لما الغشاء المخاطي اللي بيحمي المعدة والآثنى عشر يضعف ..
طيب والسبب :
- العدوى ببكتيريا الملوية البابية أو جرثومة المعدة ..
- تلف الغشاء المخاطي للمعدة نتيجة زيادة الحموضة ..
- فرط إستخدام مضادات الألتهاب زي الأسبرين والكرتيزون وأدوية الروماتيزم..
- الضغوط النفسية والأرق كمان سبب ..
- الأكل الحار والتوابل ونظام الأكل ..
- الكحول والدخان والكافيين ..
- أمراض إذا ذُكرت ذُكر قرحة المعدة زي الفشل الكلوي وأمراض الكبد ونشاط الغدة ومشاكل المرئ ..

تعرف إنها قرحة معدة مش أي حاجة غيرها : لما يبدأ التعب من فُم المعدة تحت الصدر بالظبط يقلب بحرقان وإنتفاخ وحرقة وحموضة ويبتدي فقدان شهية وإرتجاع وغثيان ... والوصول لنزيف الجهاز الهضمي ودة من مضاعفات قرحة المعدة إنها تقلب بنزيف ..

كـ قرحة معدة ممكن نستخدم بيكربونات الصوديوم الطبية بس نستخدمها بالعقل عشان أي إفراط فيها هيعلي الضغط .. والمستكة علاج هايل لمشاكل المعدة في العموم وبالأخص للقرحة .. وممكن نشرب الريحان والزنجبيل عشان مضاد ألتهابات أصلاً ..

المعدة بيت الداء .. ماتدخللهاش أي حاجة تأذيها .. شير وفيد
دمتم بصحة ♥️
الدكتوره ساره

إيه رأيك في الريحة دي .. دة بقى أخطر سؤال ممكن حد يسألهولك زي فين بطاقتك كدة ..
تخيل بقى تدور على حاسة الشم ماتلاقيهاش ! أنت في كارثة ..
بس ثواني .. ما يمكن جيوب أنفية .. وألتهبت من كتر السجاير والروايح النفاذة وأكل الحوادق والشطة والأكل اللي كله مواد حافظة .. آه أيوه دي أسباب ألتهابات الجيوب الأنفية ..

طيب وبعدين ما غير حاسة الشم عندنا صداع وعدم إتزان ورشح وسيلان .. دة برضو جيوب أنفية ولا حاجة تانية يا دكتور .. هقولك لا يكلف الله نفساً إلا وسعها ..
كمامتك ماتفارقكش .. ماتنزلش من بيتكوا من غير كوباية مياه دافيه بعسل .. خد معاك الكركمين الشغل أشرب منها في البريك بتاعك .. مش لازم برفان من شعرك لرجلك .. خُد أكلك معاك ..
أرجع البيت نظف أنفك بإستنشاق ماء بخار مضاف له زيت زعتر بس ماتسترخصش ..

لو متأكد إنها جيوب أنفية .. طب ما تعالجها سايبها تعذبك وتزود توترك لو ألتهبت فتقلل مناعتك ليه .. جاي عليك بـ إيه ..
شير يا معشر الجيوب الأنفية وأنقذوا الموقف ..
دمتم بصحة ♥️
الدكتوره ساره

إرمي البذرة وأروي الزرعة ..
بشرتك هي زرعتك لو ماهتمتيش بيها تدبل وتجف وتعجز بسرعة ..
خصوصاً الفترة اللي جايه أصحاب البشرة الجافة هيعانوا من الألتهابات والغمقان والحكة بسبب الجفاف ..
دقة ساعة العمل :
الزبادي والعسل دخليهم في أي ماسك هتعمليه ..
زيت الزيتون كل يوم بليل قبل النوم غذي بشرتك بمضادات الأكسدة اللي فيه ويصلحلك الخلايا التالفة وتفضلي بنت عشرين كدة ..
ڤيتامين E زي الفاتيكوفيرول عشان الجلد الميت ..
چل الصبار يعني نضارة وبشرة رطبة دايماً ، بس نركز بالله عليكوا نجيبه منين ، لا يكون مخلوط ولا مش متشال منه العصارة الصفراء ..
لو على التفتيح ونستغل عدم وجود الشمس معظم الوقت فـ عنب الدُب موجود ..
شجرة التي مشهورة جداً وفعالة جداً في موضوع الحبوب والسيدات بيستخدموه كـ (تونر) بالنسبالهم ..

بشرتك ليها عليكي حق .. زي ما هتشربي ماء .. لازم تغذيها ..
شير عشان أنتوا بتحبوا مواضيع التجميل أنا عارف ..
دمتم بصحة ♥️
الدكتوره ساره