أثر - Ather

لو قلنا ليكم إنه أول منتج من أثر ممكن يكون خمرة المحلب .. موافقين؟!

ولا عندكم إختيار تاني دايرين تشوفوه أول؟

بعد فترة من التحضير، والتجهيز، والتفكير في كل التفاصيل الصغيرة قبل الكبيرة .. بقينا قريبين جداً من أول إطلاق لمنتجات #أثر .

وطول الفترة الفاتت كنا بنشارككم حكايات البخور السوداني، وأسرار المكونات، وجمال التراث البتحمله الروائح السودانية الأصيلة .. وهسي قربنا من الخطوة البعدها أول منتج حيحمل اسم #أثر ❤️

ومن أكتر الخيارات البنتحمس ليها .. خمرة المحلب لأنها ما مجرد ريحة .. هي جزء من ذكريات كتيرة، ومرتبطة عند ناس كتار بالأناقة السودانية، والمناسبات، والريحة البتخلي الناس تقول: "الريحة الحلوة دي جاية من وين؟" 😍

وفي #أثر بنحب الحاجات البتحمل روح التراث، لكن بلمسة عصرية وتفاصيل معمولة بعناية .. عشان كدا حابين نسمع رأيكم قبل أي خطوة ❤️

ورونا في التعليقات:
1️⃣ موافقين إنو خمرة المحلب تكون أول منتج من أثر؟
2️⃣ ولو عندكم اختيار تاني، شنو المنتج البتتمنوا تشوفوه من أثر قريب؟
3️⃣درجة حماسكم لإطلاق خمرة أثر كم من 10؟
متحمسين نقرأ كل آرائكم ونبني الرحلة دي معاكم خطوة بخطوة




#قريباً

متين تعرف إنك عملت أثر حقيقي؟!

لما الناس تبقى مستنية جديدك؟ ولا لما تلقى أفكارك بقت بتتكرر في كل مكان؟

الفترة الفاتت بقينا شايفين أثرنا بينتشر أكتر وأكتر، ودا شيء بفرحنا من القلب😍 لأنه أجمل إحساس إنك تعرف إنه الحاجات البتعملها بحب، وبتفاصيل، وبنية صادقة .. قدرت توصل للناس.

بالنسبة لينا، الأثر الحقيقي ما بتقاس بعدد المشاهدات أو الإعجابات وبس .. الأثر الحقيقي هو إنك تلهم، وتخلي الناس تتفاعل مع أفكارك، وتحس إنه الرسالة الوصلتها ليهم لقت مكانها ❤️

ودا بالضبط السبب الخلانا نبدأ رحلة #أثر .. رحلة بنحاول فيها نحيي جمال التراث السوداني، ونحكي حكاياته بطريقة مختلفة، ونشارككم ريحة الذكريات البتسكن في تفاصيلنا اليومية ولسة الأجمل جاي.

لأنه قريب جداً، خمرة #أثر حتكون بين إيديكم، محضرة بنفس الحب والاهتمام بالتفاصيل الإتعودته عليها مننا ❤️

سؤالنا ليكم:
1️⃣ في رأيكم، شنو الحاجة البتخلي أي براند يترك أثر حقيقي في الناس؟
2️⃣ وشنو أكتر حاجة خلتكم ترتبطوا بـ #أثر لحدي الآن؟



#قريباً

لمن تكوني دايرة تشتري عطر، خمرة، بخور، أو أي حاجة ريحتها حلوة .. أول زولة بتسأليها منو؟!

في ناس عندهم زولة معينة رأيها ما بيتفوت .. أمك .. صحبتك .. خالتك .. أختك؟ ولا الزولة البتعرف كل جديد قبل الناس كلها؟

في النهاية كلنا عندنا شخص بنثق في ذوقه، وبنرجع ليه قبل ما نشتري أي حاجة جديدة .. يمكن عشان كدا بعض الروائح بتبقى مرتبطة بأشخاص معينين في حياتنا .. ريحة بتفكرنا بأم، أو خالة، أو صاحبة، أو حتى ذكرى جميلة ما بتتنسى❤️

وفي #أثر .. بنؤمن إنه الريحة الحلوة ما مجرد منتج .. هي إحساس، وذكريات، وحكايات بنتشاركها مع الناس البقربوا لينا ومع اقتراب إطلاق خمرة #أثر، دايرين نعرف .. منو الزولة البتسأليها دائماً عن العطور والخُمرة والبخور؟

أعملي ليها تاق وقولي لينا ليه بتثقي في ذوقها؟ 😍



#قريباً

لو إنتي صاحبة القرار .. حتختاري شنو لتغليف خمرة أثر؟!

البيج الهادئ الأنيق ولا الكبدي الدافئ والفخم .. لأنه اللحظة المنتظرنها قربت .. وخمرة #أثر بقت أقرب من أي وقت فات.
لكن قبل ما نوصل للحظة دي، دايرين نأخد رأي أهم ناس في الرحلة كلها .. إنتو 😍

بعد فترة من التجهيز، والتفكير في التفاصيل الصغيرة قبل الكبيرة، وصلنا لمرحلة إختيار التغليف النهائي لخمرة #أثر.
لأننا مؤمنين إنه الجمال ما في الريحة براها .. حتى أول إنطباع بيبدأ من شكل العبوة البتمسكيها في يدك ❤️

وعشان كدا محتاجين رأيكم .. أي لون حسيتو بعبر أكتر عن #أثر؟

البيج الهادئ الأنيق ولا الكبدي الدافئ والفخم؟
صوتكم بفرق معانا، ويمكن يكون سبب في إختيار الشكل النهائي البتشوفوه قريب💛

وفي #أثر بنحب نخليكم جزء من الحكاية من بدايتها .. لأنه خمرة #أثر ما مجرد منتج، هي ريحة وذكريات وتراث سوداني جميل بنجهزه ليكم بحب وتفاصيل كتيرة.

هسي ورونا في التعليقات:
1️⃣ البيج ولا الكبدي؟ وليه اخترتو اللون دا؟
2️⃣ درجة حماسكم كم من 10 لإطلاق خمرة أثر ؟

#قريباً

عمرك شفتي بخور سوداني بتكور زي الحلاوة؟!

أيوا😍
وفي ختام رحلتنا مع أسرار البخور السوداني، وصلنا لواحد من أكثر الأنواع المميزة في الشكل وطريقة التحضير .

بخور كرات الصندل:
بخور مختلف عن الأنواع التقليدية، لأنه بتشكل في صورة كرات صغيرة مليانة بالعطور والمكونات الفاخرة، ودا البخلي ريحته قوية وثابتة من أول إستخدام.

1️⃣ البداية بتكون بإضافة السكر المكرمل، وبعده بنضيف ليهو شوية موية وعصير ليمون عشان نحصل على القوام المناسب.

2️⃣ بعد داك بنضيف الصندل المبشور للشيرة الساخنة، ونقلب كويس عشان يتشرب الخليط.

3️⃣ بعده بتبدأ مرحلة الريحة والجمال .. بنضيف المسك المطحون، والضفرة البودرة، والصندل البودرة، وبعدها مجموعة من العطور المائية والزيتية زي: الصندلية، دهن الصندل، العود الهندي، عود العنفر، وأحياناً بعض العطور الفرنسية حسب الرغبة.

4️⃣ بعد ما تتجانس المكونات كلها، بنضيف كمية إضافية من بودرة الصندل لحدي ما الخليط يمسك قوامه.
وبعدها تتدهن اليدين بدهن الصندل أو الصندلية، وتبدأ مرحلة تكوير البخور في شكل كرات جاهزة للتعتيق والاستخدام.

ويمكن دا السبب البخلي بخور كرات الصندل مميز .. لأنه ما بعتمد على مكون واحد، بل على طبقات من الروائح بتتداخل مع بعض عشان تطلع ريحة فخمة وغنية وثابتة.

ومع نهاية سلسلة البخور السوداني، اكتشفنا مع بعض أسرار المستكة، والعنفر، والصندل، والشاف، والبخور السائل .. وكل نوع كان وراه حكاية، ومكونات، وتفاصيل صغيرة بتصنع الفرق.

وفي #أثر .. بنؤمن إنه أجمل الروائح هي البتحمل معاها قصة .. وعشان كدا خمرة #أثر جاية بنفس الروح تراث سوداني أصيل، ومكونات مختارة بعناية، وتفاصيل بتخلي الأثر يبقى في الذاكرة قبل المكان.

سؤالنا ليكم في ختام السلسلة:
1️⃣ شنو أكتر نوع بخور عجبكم واتعلمتوا عنه حاجة جديدة من السلسلة؟
2️⃣ المستكة، العنفر، الصندل، الشاف، كرات الصندل؟
ولو في نوع بخور سوداني تاني دايرين نتكلم عنه مستقبلاً، ورونا في التعليقات.

لو قلنا ليك إنه في بخور سوداني ما بجي في شكل قطع ولا أعواد .. لكن بنفس الفوحان والثبات؟!

أيوا😍
اليوم بنواصل رحلتنا في عالم البخور السوداني مع واحد من الأنواع البقت محبوبة عند ناس كتار في السنين الأخيرة ..
بخور الصندل السائل .. الميزة البتميزه إنه بجمع بين فخامة الصندل وسهولة الإستخدام ، وفي نفس الوقت بتتحكمي في قوامه وتركيزه حسب الطريقة البتتحضر بيها.

1️⃣ البداية بتكون بتجهيز المكونات الأساسية:
بودرة الصندل، بودرة المسك، والضفرة المعتقة وبتنخلط كلها في إناء واسع لحدي ما تتجانس كويس.

2️⃣ بعداك بنبدأ نضيف العطور السائلة بالتدريج .. زي خمرة الضفرة، خمرة المحلب، الصندلية، ودهن الصندل.
3️⃣ ومع التحريك المستمر بتبدأ المكونات تأخد قوام متوازن؛ لا سائل شديد ولا تقيل شديد.

4️⃣ بعدها بنضيف السكر المكرمل للخليط، ونواصل التحريك لحدي ما كل المكونات تتجانس وتدينا القوام النهائي المعروف لبخور الصندل السائل.

ويمكن السر البخلي ناس كتار يحبوه إنه بجمع بين نعومة الصندل، وفوحان العطور، وثبات الضفرة والمسك في خلطة واحدة.

وفي #أثر بنحب التفاصيل البتبدأ من إختيار المكونات قبل ما توصل للريحة النهائية .. لأنه الريحة الجميلة ما بتجي صدفة، بتبدأ من مكونات اتجمعت بعناية وحب 🥰 وزي ما بخور الصندل السائل عنده أسراره، برضو خمرة #أثر جاية بنفس الفكرة .. مكونات مختارة بعناية، وتراث سوداني أصيل، ولمسة عصرية تخلي الأثر يبقى أطول.

سؤالنا ليكم:
1️⃣ جربتي بخور الصندل السائل قبل كدا ولا لحدي هسي بتفضلي البخور التقليدي العادي؟
2️⃣ ولو خيروك بين الصندل، المستكة، العنفر، والشاف تختاري شنو؟ وليه؟

ليه بخور الشاف هو الأساس البتتبني عليه أنواع بخور كتيرة؟!

السر ما في الريحة براها .. السر في الخشب، والخلطة، والطريقة البتخلي الشاف واحد من أهم أنواع البخور في التراث السوداني❤️

اليوم بنواصل رحلتنا في عالم البخور السوداني مع واحد من أقدم الأنواع وأشهرها .. بخور الشاف واحد من أنواع البخور الإرتبطت بريحة البيت السوداني، وذكريات اللمة، والمناسبات، والضيوف البيدخلوا البيت ويقولوا: "الريحة دي جاية من شنو؟" 😍

لكن شنو البخلي الشاف مميز؟

1️⃣ البداية بتكون بغسيل خشب الشاف كويس بالموية، وبعدها بنخليه ينشف تماماً بعد ما ينشف، بنرش عليه شوية من العطور السائلة عشان الخشب يتشرب الريحة من البداية.

2️⃣ بعد داك بنجهز الخلطة التراثية المميزة: مسك مطحون و ضفرة، صندل، وقرنفل مطحون مكونات بسيطة، لكن كل مكون فيها بضيف لمسته الخاصة للريحة النهائية.

3️⃣ بعدها بنبدأ تجهيز الشيرة بإضافة السكر مع عصرة ليمون على نار هادية لحدي ما يأخد لون بني جميل بعده بنضيف فنجان عسل عشان يندمج مع السكر ويدي الخليط القوام المناسب.

4️⃣ بعد ما الشيرة تكون جاهزة، بننزل الحلة من النار أولاً، وبعدها بنضيف ليها خشب الشاف ونقلب كويس لحدي ما يتشرب الخليط.

بعد داك بنضيف المكونات المطحونة والعطور السائلة حسب الرغبة، ويفضل تكون من نوعية ممتازة عشان النتيجة تكون أجمل وأثبت.

ودي خطوة مهمة جداً، لأنه العطور السائلة والزيوت العطرية ما بتتضاف والحلة في النار، عشان الحرارة ما تأثر على الريحة والفوحان.

5️⃣ بعد إضافة كل المكونات، بنقلب الخليط كويس لحدي ما تتجانس المكونات مع بعضها تماماً ويتوزع العطر بصورة متساوية داخل البخور.

6️⃣ وآخر خطوة بنغطي الحلة ونخلي البخور يبرد، وبعدها بنحفظو في برطمان مقفول كويس عشان يحافظ على ريحته وفوحانه لأطول فترة ممكنة.

ويمكن عشان كدا بخور الشاف من أكتر أنواع البخور المحبوبة .. ريحة دافئة، تراثية، ومليانة إحساس بالبيت السوداني.

وفي #أثر .. بنحب الحاجات البتبدأ من الجذور .. لأنه التراث الحقيقي ما مجرد ريحة، التراث حكايات وتجارب بتتوارثها الأجيال، وبتفضل عاملة #أثر جميل في الذاكرة.

وزي ما البخور عنده أسراره، برضو خمرة #أثر .. عندها حكاية من التفاصيل والمكونات البتتجمع بحب عشان تصنع ريحة تبقى في الذاكرة 💛

هسي ورونا:
1️⃣ شنو أقرب نوع بخور لقلبكم الشاف، المستكة، العنفر، الصندل وليه؟
2️⃣ في بيتكم زمان، منو كان المسؤول من تجهيز البخور؟ أمك؟ حبوبتك؟ ولا إنتي ؟


#بخورسوداني
#ذكرياتسودانية

هل فعلاً بخور الصندل هو أفخم أنواع البخور السوداني؟!

ولا دي مجرد سمعة اتوارثناها؟

في البوست الرابع من سلسلة أسرار البخور السوداني .. اليوم بنتكلم عن البخور البعتبره ناس كتار "ملك البخور السوداني".. بخور الصندل 😍

لكن شنو البخليه مميز؟
البداية بتكون بإختيار أعواد صندل درجة أولى، لأنه جودة الصندل هي البتحدد جودة البخور من الأساس.
بعدها يتم تعتيق الأعواد في الصندلية داخل علبة مقفولة، عشان الخشب يتشرب الريحة ويكون جاهز للمرحلة البعدها.
بعداك بتتحضر الشيرة من السكر وعصرة الليمون، بعدين ُُتضاف المكونات الأساسية زي المسك وبودرة الضفرة.
وبعدها تبدأ مرحلة تغليف أعواد الصندل بالشيرة تدريجياً مع التحريك المستمر، لحدي ما تتشرب المكونات كلها.
وآخر لمسة بتكون بإضافة الصندلية وبودرة الصندل والمسك، عشان تظهر الشخصية الحقيقية للبخور.

لكن السر الحقيقي ما في الخطوات براها ..السر في جودة المكونات .. عشان كدا الحبوبات زمان كانوا بقولوا: "الصندل الرديء ما بتصلحو الخلطة .. كل ما كانت الأعواد أنضف، والصندلية أجود، والمسك أنقى .. كل ما كانت النتيجة أفخم.

ودا السبب البخلي بخور الصندل معروف بالفخامة والرقي أكتر من أي نوع تاني .. ريحة هادئة .. ثبات جميل .. وحضور بملى المكان من غير ما يكون مزعج.

وفي #أثر .. بنؤمن إنه الفخامة الحقيقية ما في الكترة .. الفخامة في إختيار المكونات الصاح، والعناية بالتفاصيل من البداية للنهاية😌 ودا نفس المبدأ البنحب نشتغل بيه في خمرة #أثر .

هسي نجي للسؤال المهم:
لو طلبنا منك تختاري أفخم نوع بخور سوداني الصندل، العنفر، المستكة؟ واحد بس 😅 شنو اختيارك وليه؟


#بخورسوداني

ليه بخور العنفر ما بشبه أي بخور تاني؟!

لأنه سره ما في الريحة بس .. السر في المكونات، والتعتيق، والصبر البدخل في كل مرحلة من مراحل صناعته ❤️

في البوست التالت من سلسلة أسرار البخور السوداني .. اليوم بنتعرف على واحد من أرقى وأهدى أنواع البخور السوداني .. بخور العنفر 😍 بخور ارتبط بالمناسبات السعيدة، وجهاز العروس، ولمة البيت السوداني، عشان كدا بقى محافظ على مكانته عبر السنين.

لكن شنو الحاصل ورا الريحة المميزة دي؟
1️⃣أول خطوة بتبدأ بتعتيق أعواد العنفر (قلب العنفر) لمدة من 10 إلى 15 يوم .. خلال الفترة دي بتتم إضافة خمرة الضفرة أو خمرة المسك، مع عطور مائية زي فلير دامور، وبعدها بتتحفظ في علبة مقفولة كويس عشان الأعواد تتشرب المكونات والعطور.

2️⃣ بعد داك بتبدأ مرحلة كرملة السكر البودرة على نار هادية جداً، مع كمية بسيطة من الموية وعصرة ليمونة.
ولمن يبدأ الخليط يغلي وتظهر الفقاعات، دا معناه إنه الموية تبخرت ووصل للقوام المناسب.

3️⃣ في إناء منفصل بنضيف أعواد العنفر المعتقة، ومن غير أي نار، بنضيف الصندلية ودهن الصندل.

4️⃣ بعدها بنضيف السكر المكرمل، وبودرة الصندل، وبودرة الضفرة، والعطور الزيتية حسب الرغبة.

5️⃣ وآخر خطوة هي التحريك الجيد لحدي ما السكر يمسك كل المكونات وتتجانس مع بعض، وبكدا بكون بخور العنفر جاهز.

ويمكن هنا يكون السر الحقيقي .. لأنه بخور العنفر ما معروف بالقوة والحدة، لكن معروف بريحته الهادية والباردة، وفوحانه الذكي، وثباته الجميل في البيت والتياب والمفارش.
عشان كدا ناس كتار بعتبروه بخور الأناقة الهادية.

وفي #أثر .. بنحب الحاجات البتحتاج صبر وعناية بالتفاصيل .. لأنه أجمل الروائح هي البتتحضر بحب، وبتخلي أثرها حتى بعد ما تغادر المكان 💛

سؤالنا ليكم:
لو خيروك تختاري نوع واحد فقط للبيت العنفر، المستكة،
الصندل، وليه؟


#بخورسوداني
#ذكرياتسودانية

عمرك سألتي نفسك بخور المستكة البتحبي ريحته دا .. بتعمل كيف؟!

القطعة الصغيرة البتملأ البيت ريحة جميلة، وبتخلي أي زول داخل يقول: "البخور دا شنو؟"

في أول بوست من سلسلة أسرار البخور السوداني .. تعالي نتعرف على رحلة بخور المستكة من البداية للنهاية:

1️⃣ تدويب المستكة بنبدأ بتدويب حبات المستكة على نار هادية😌 ومهم جداً ما نخلي المستكة تصل مرحلة الغليان، عشان تحافظ على ريحتها وخواصها العطرية.

2️⃣ إضافة الزيت العطري .. بعد ما تدوب المستكة، بنضيف الزيت العطري بنسبة 5 جرام لكل 100 جرام مستكة، أو ما يعادل 4 مل من الزيت العطري.

3️⃣ التصفية
بعدها بنصفي المستكة من أي شوائب في إناء منفصل، عشان نحصل على قوام ناعم ومتجانس.

4️⃣ إضافة الصندل أو الضفرة .. بنضيف بودرة الصندل أو بودرة الضفرة حسب الرغبة، شوية شوية مع التحريك المستمر لحدي ما المكونات تتجانس كويس .. ولو حبيتي تضيفي لمسة جمالية، ممكن استخدام ألوان المايكا حسب الرغبة.

5️⃣ التشكيل .. بنصب الخليط في قوالب سيليكون نضيفة، جافة ومعقمة كويس، وبعدها بنخليه يبرد ويتماسك تماماً.

يمكن عشان كدا بخور المستكة كان وما زال واحد من أكتر أنواع البخور المحبوبة عند السودانيات .. لأنه وراء ريحته الجميلة تفاصيل صغيرة وخطوات دقيقة بتفرق في النتيجة النهائية❤️

وفي #أثر .. فلسفتنا بتقول إنه الريحة الحلوة ما بتبدأ من المبخر .. بتبدأ من العناية بالتفاصيل، ومن الحكاية البتتعمل بحب من البداية للنهاية.

سؤال أثر ليكم:
1️⃣ إنتي من فريق بخور المستكة ولا فريق بخور الصندل؟
3️⃣ شنو أكتر نوع بخور مرتبط عندك بذكريات البيت؟


#بخورسوداني