AMIRA ANOUR

في كمية اسئلة توصلني ع الخاص بخصوص السكن كير وبجديات فرحانه انكم تقصدو فيا وعندكم ثقة في كلامي والمنتجات اللي نزل عليها 🩷
لان فعلاً حتى اني كنت ف يوم من الايام زيني زيكم نجمع في فلوسي ونلقط بالايام ومرات بالشهور باش نشري منتج يكون كويس ويفيد بشرتي ف كل منزل على شي حاطتكم بين عيوني ونشوف فيكم وخياتي كلكم 🩷
ولكن مرات يكون صعب عليا اني نرد على كل الاسئلة اللي تجيني ف قررت كل يوم حنزلكم منتج اني مجربته او حد نعرفه جرب منتج وشفت النتيجة بعيوني ومنها يكون ليكم مرجع في صفحتي وتشوفو شن يمشي معاكم ومع بشرتكم 🩷✨
اليوم المنتج اللي حنتكلم عليه بسيط ولكن نتيجته جداً حلوة من براند امريكية معروفة واللي هيا oilatum واللي هوا ‘’ كريم ترطيب ‘’
المنتج هادا ليا كم يوم نستخدم فيه اني وامي وفي مشكلة امي ديما تواجه فيها ان بشرتها جداً جافة وحساسة وعلى قد مجبتلها منتجات طبية وتجاريه لوجهها وايديها ميمشوش معاها ويقعدو يحرقو فيها ومرات نكون حتى اني ماشيين معاي لكن هيا لا بحكم عندها اكزيما ف فعلاً عارفة معاناة البنات اللي عندهم الشي هادا
ف هيا بروحها لاحظت الفرق

1- اول شي ترطيبه عميق
2- كريمي وقوامه مش خفيف ع البشرة بحيث يدوم اكتر على البشرة
3- يمتص بسرعة اول متحطيه وميقعدش يضايق او ينمسح ف الحوايج
4- كميته جداً مناسبة
5- استخدامه للجسم كله ايدين وجه واي مكان عندك فيه جفاف
6- ريحته جميلة مش زي اغلب منتجات الترطيب الطبيعية
اللي ف الصوره نوعين في النوع العادي للبشرة الجافة والتاني اللي استخدماته امي لوجهها وايديها اللي هوا للبشرة المعرضة للاكزيما وجافة جداً
وزي معارفين ان الشتاء خش والجفاف بيكتر وشرب المية بيقل ف محتاجين كريمات مساعدة للترطيب العميق ✨
واني كشخص جداً يعشق الترطيب اخترت اليوم اني نزلكم على واحد من احلى المنتجات اللي جربتهم واللي شفت جدارته اكتر على امي
وبس هادا كان الملخص المفيد لكريم الترطيب oilatum
قولولي ف التعليقات شن الحاجات اللي حابين اني نتكلم عليها المرة الجاية ؟
#اكزيما ⁩

صفحة جديدة ورحلة جديدة ، هني حتلقو كل شغلي واعلاناتي باذن الله ✨♥️