Avana Anay boutique

Matetika dia toa manorisory sy manirikiry antsika ny fisian'ireo bibikely ao atrano, ireto ary misy fikafika entina amintsika isorohana azy ireny

Vitsika, kadradraka, kalalao, lalitra, koroka… maro ireo bibikely manelingelina ny filaminana sy ny fahadiovana ao an-tokantrano. Efa nampiasa odim-biby isan-karazany ianao nefa mbola miverina foana ireo bibikely ireo ? Ireto ary misy fomba fisorohana sy fiadiana amin’ireo bibikely ao an-trano.

Atao madio tsara ny trano
Anisan’ny misarika ireo bibikely fahita ao an-trano ny loto. Ny potin-tsakafo no tena ankafizin’izy ireny. Ny lakozia moa no lasibatra matetika amin’izany. Ho fisorohana ny fidiran’ny vitsika, kalalao sy ny lalitra ao an-trano dia mila atao madio tsara ny lakozia sy ny efitra fisakafoanana. Diovina tsara ny fitaovana fihinana sy ireo fitaovana nandrahoana sakafo. Tsy tokony avela hijanona maloto, indrindra mandritry ny alina. Toy izany ihany koa ny latabatra, seza sy ny tany. Fafana tsara hialan’ny potin-kanina.

Diovina ary atao maina tsara ireo fanaka rehetra
Mora mandomando ny fanaka, indrindra ireo vita amin’ny hazo. Ankafizin’ny bibikely, toy ny kadradraka sy ny ny koroka, manokana io hamandoana io. Mila ezahina diovina sy atao maina tsara hatrany noho izany ny fanaka rehetra, na ny ao an-dakozia, efitrano fatoriana, efitra fisakafoanana… Tsara kokoa raha avela itapiandro kely indray mandeha isan-kerinandro rehefa avy diovina tsara.

Mampiasa ireo fikafika natoraly iadiana amin’ny bibikely
Maro ireo fikafika natoraly afaka ampiasaina iadina amin’ny bibikely raha tsy te hampiasa ireo ody biby simika ianao. Afaka atao ohatra ny manafangaro rano sy vinaigitra mitovy fatra. Atao anaty tavoahangy ary atsifitra eo amin’ny toerana ahitana vitsika, kalalao na lalitra. Mampitsoaka ny bibikely ihany koa ny akora mahery fofona toy ny dipoavatra mainty sy ny jirofo. Afafy eo amin’ny faritra ahitana tangorona vitsika izy ireny ka mampitsoaka azy ireo.

Miarahaba antsika mpanaraka ny pejy, hizara fikafika kely isika anio; mamakia finaritra ary.

Fikafika natoraly manampy amin’ny fanesorana ny tasy amin’ny hodi-tava

Maro ireo tasy manimba ny endriky ny hodi-tava raha tsy hitanisa afatsy ny panda sy ny tasy navelan’ny mony. Efa misy moa ireo karazana vokatra efa vonona ampiasaina (produits) azo ampiasaina hanalana azy ireny. Ho an’ireo tsy tia mampiasa vokatra misy akora simika dia ireto ary misy fikafika natoraly manampy amin’ny fanesorana ny tasy amin’ny hodi-tava.

Dintin-tsavony Nosy sy tantely ary masonjoany
Fangaro iray manampy betsaka amin’ny fanesorana ny tasy amin’ny hodi-tava ary manadio ny tarehy tantely sy masonjoany ampiarahana amin’ny dintin-tsavony Nosy. Lomana rano ny savony Nosy izay ilaina ary avela ho lasa malemy sy madinty. Rehefa vita izay dia maka io dintin’ny savony Nosy io 2 sotro fihinana ary afangaro amin’ny tantely sy masonjoany efa voakiky samy mitovy fatra aminy. Atao mifangaro tsara ary io no atao sarona (masque) eo amin’ny tarehy madio mandritra ny 30 minitra. Kobanina amin’ny ravim-boafotsy avy nampangotrahina sy efa mangatsiaka. Ampiasaina isaky ny roa andro io sarona io.

« Yaourt » afangaro amin’ny tantely
Fangaro natoraly mampisinda ny tasy ary manazava ny hodi-tava ny « yaourt » ampiarahana amin’ny tantely. Maka « yaourt » roa sotra fihinanana ary afangaro tsara amin’ny tantely roa sotro fihinanana. Ahosotra amin’ny tarehy efa nodiovina tsara mialoha io fangaro io ary avela hilona mandritra ny 30 minitra. Rehefa vita izay dia kobanina tsara amin’ny rano matimaty. Tsara raha « yaourt nature », izany hoe tsy misy siramamy no ampiasaina. Ampiasaina isan’andro mba ahazoana vokatra.

Ireo fitandremana mba hisorohana ny tasy amin’ny hodi-tava
Arak’ilay oha-pitenenana hoe « aleo misoroka toy izay mitsabo » dia tsara hatrany ny miala amin’ireo fahazaran-dratsy tsara mahatonga ny tasy amin’ny hodi-tava. Mba hisorohana ny fipoitran’ny mony, ny panda na ny tai-parasy amin’ny tarehy dia mila :
-Misotro rano tsara isan’andro ;
-Tsy miari-tory ;
-Miaro ny hodita amin’ny hain’andro ;
-Tsy mifoka sigara ;
-Tsy misotro toaka be loatra ;
-Lanjalanjaina ny fihinanana sakafo matsiro sy be menaka ;
-Ahena ny fihinanana siramamy.