Inter Service Intelligence

وزیرِ اعظم محمد شہباز شریف اور آرمی چیف فیلڈ مارشل سید عاصم منیر کا وفد کے ہمراہ ولیِ عہد شہزادہ محمد بن سلمان کی خصوصی دعوت پر دورہء سعودی عرب

گذشتہ شب عمرہ کی سعادت، پاکستانی وفد کے لیے خانہ کعبہ کا دروازہ خصوصی طور پر کھولا گیا

وزیراعظم اور آرمی چیف نے وفد کے ہمراہ خانہ کعبہ میں نوافل ادا کیے اور بنیان مرصوص کی عظیم فتح پر اللہ تعالیٰ کا شکرانہ ادا کیا

پاکستان کی معاشی میدان اور عوامی فلاح کیلئے اقدامات کے حوالے سے حالیہ کامیابیوں پر اللہ رب العزت کا شکر ادا کرتے ہوئے ملکی ترقی و خوشحالی کے ساتھ ساتھ امت مسلمہ بالخصوص ظلم و جبر کے شکار کشمیری و فلسطینی مسلمان بہن بھائیوں کیلئے خصوصی دعائیں کیں

نائب وزیرِ اعظم و وزیرِ خارجہ محمد اسحاق ڈار، وزیرِ داخلہ سید محسن رضا نقوی اور وزیرِ اطلاعات و نشریات عطاء اللہ تارڑ بھی وزیرِاعظم کے ہمراہ تھے

فیلڈ مارشل سید عاصم منیر، نشانِ امتیاز (ملٹری)، چیف آف آرمی اسٹاف (COAS) نے آج کمانڈ اینڈ اسٹاف کالج کوئٹہ کا دورہ کیا اور اسٹاف کالج کے زیرِ تربیت افسران اور فیکلٹی سے خطاب کیا۔

فیلڈ مارشل نے آپریشن "بنیان مرصوص" کے شہداء کو خراجِ عقیدت پیش کیا اور ان کے اہلِ خانہ سے مکمل یکجہتی کا اظہار کرتے ہوئے کہا کہ قومی قیادت کی رہنمائی میں پاکستانی عوام نے مادرِ وطن کے دفاع کے لیے فولادی دیوار کا کردار ادا کیا۔ افواجِ پاکستان کی پیشہ ورانہ صلاحیتوں کو سراہتے ہوئے، چیف آف آرمی اسٹاف نے کہا کہ "معرکۂ حق" میں کامیابی ہماری قومی عزم اور تمام ریاستی عناصر کی مکمل ہم آہنگی کا مظہر ہے۔

علاقائی اور عالمی حالات پر تبصرہ کرتے ہوئے، فیلڈ مارشل نے ابھرتے ہوئے تنازعات کی نوعیت پر روشنی ڈالی، خصوصاً بھارت کی جانب سے پاکستان کے خلاف جارحیت کے بڑھتے ہوئے خطرناک رجحان کو اجاگر کیا۔ انہوں نے اس عزم کا اعادہ کیا کہ پاکستان ہر قسم کی جارحیت کو شکست دینے اور خطرات سے نمٹنے کی مکمل صلاحیت رکھتا ہے۔ انہوں نے واضح کیا کہ پاکستان کو دباؤ میں لانے کی کوئی کوشش کامیاب نہیں ہوگی اور دہشت گردی کے خلاف پاکستان کی کوششوں کو سبوتاژ کرنے والے دشمنانہ عزائم کو مکمل طور پر ناکام بنایا جائے گا۔ جنوبی ایشیا میں اسٹریٹجک استحکام کے لیے کشمیر کے دیرینہ اور بین الاقوامی سطح پر تسلیم شدہ مسئلے کے پرامن حل کی ضرورت پر زور دیا اور بھارت کی جانب سے غیر قانونی اور ناقابلِ قبول "آبی دہشت گردی" سے خبردار کیا۔

بھارت کی ریاستی سرپرستی میں پاکستان کے اندر دہشت گردی کے واقعات پر بات کرتے ہوئے، فیلڈ مارشل نے انسدادِ دہشت گردی کی نئی مہم پر اعتماد کا اظہار کرتے ہوئے کہا کہ قوم کی دہشت گردی کے خلاف جنگ کو منطقی انجام تک پہنچایا جائے گا، اور دہشت گردی کی ہر شکل و صورت کو جڑ سے اکھاڑ پھینکا جائے گا۔

رہنمائی کے موضوع پر گفتگو کرتے ہوئے، فیلڈ مارشل نے زیرِ تربیت افسران کو تلقین کی کہ وہ اپنی ذمہ داریاں بھرپور عزم، خلوص اور جذبے سے ادا کریں۔ انہوں نے تحقیق اور جدید سوچ کی اہمیت پر زور دیتے ہوئے کمانڈ اینڈ اسٹاف کالج کوئٹہ کو مستقبل کے عسکری قائدین کی تربیت کے لیے سراہا، جو اس مقدس پیشے کے اعلیٰ ترین معیار کی پاسداری کریں۔ انہوں نے کہا:
"تربیت نہ صرف موجودہ حقائق کی عکاسی کرے، بلکہ ہمیں مستقبل کے میدانِ جنگ کے لیے بھی تیار کرے، جو چابک دستی، جدت اور غیر متزلزل عزم کا تقاضا کرتا ہے۔"

اس سے قبل کوئٹہ آمد پر فیلڈ مارشل کا استقبال کمانڈر کوئٹہ کور اور کمانڈنٹ کمانڈ اینڈ اسٹاف کالج کوئٹہ نے کیا۔