Second chance
Share
تفائل بما تهوى يكن
اكلك سبب مشاكل بشرتك!
الأكل عندو علاقة مباشرة بالبشرة، أكتر من أي كريم أو ماسك. السكر العالي، المقليات، والأكل المصنّع بسببو التهابات داخلية، ودي بتظهر في شكل حبوب، اسمرار، وبشرة مرهقة بدون نضارة.
المشكلة إنو كتير مننا بيعالج من برا، بينما السبب الحقيقي من الداخل.
لو بشرتك فيها تعب أو تغير مفاجئ، اسألي نفسك: أنا باكل شنو؟
الحل ما في الحرمان، لكن في التوازن: تقليل السكر، تقليل المقليات، والابتعاد عن الأكل الجاهز قدر الإمكان.
وبدل ده، ركزي على: أكل طبيعي، خضار وفواكه، موية كافية، وبروتين خفيف..
البشرة ما بتتصلح من برا بس…
البشرة انعكاس حقيقي لداخلك.. ♡
لو طلعتِ من البيت من غير صن بلوك… إنتِ حرفياً بتفتحي باب أذى لبشرتك بدون ما تحسي!
الشمس ما بس “حرارة” وخلاص، دي أشعة فوق بنفسجية بتشتغل بهدوء لكن أثرها قوي جداً
بتسبب تصبغات وبقع غامقة في الوجه
بتسرّع ظهور التجاعيد والخطوط
بتضعف نضارة البشرة وتخليها باهتة
ومع الوقت ممكن تسبب ضرر عميق في خلايا الجلد
المشكلة إنو الضرر ما بظهر في نفس اللحظة… بظهر بعدين لما تقولِي: “بشرتي اتغيرت فجأة!”
الحل بسيط وما مكلف
واقي شمس (صن بلوك) يومياً حتى لو الجو غائم أو إنتِ مستعجلة.
اعتبريه زي الدرع… ما بتطلعي بدونو، لأنه هو الخط الدفاعي الأول عن بشرتك.
بشرتك بتتأثر كل يوم… فإنتِ كمان لازم تحميها كل يوم ♥
وقفي شوية… الزيت في وجهك ممكن يكون السبب في الحبوب دي!
في ناس كتير بتعمل الزيت في الوجه باعتقاد إنه بيدي نضارة، او حتى انو لمجرد التخلص من البواقي الفي اليد بحركه عفويه لكن الحقيقة شنو؟ 👇
• بيسد المسام وبيسبب حبوب
• بزيد الرؤوس السوداء
• ممكن يعمل لمعان مزعج طول اليوم
• ومع الشمس بيساهم في التصبغات
الحل بسيط:
• استخدمي مرطب خفيف بدل الزيت
• اختاري منتجات مناسبة للبشرة
• حافظي على غسول يومي لتنضيف المسام
بشرتك ما محتاجة غلطات عفويه او تجارب عشوائية… محتاجة عنايه صح..
وقفي الحاجات دي لو كنتي بتعمليها … لانك بتدمري بشرتك بأيدك وانتي مفكره بتعتني بيها.
في عادات البنات بقت تعتبرها عادية لدرجة مابحسو إنها السبب الحقيقي وراء الحبوب، الجفاف والتصبغات.
أول حاجه:
تمسحي وشك بنفس الفوطه حقت الجسم أو فوطه متروكه أيام.
البكتيريا والزيوت المتراكمة فيها بترجع مباشرة لبشرتك، وبعدها تستغربي من الحبوب الصغيرة البتطلع فجأة.
خصصي فوطه ناعمة للوجه وغيريها باستمرار.
ثاني حاجه:
تستخدمي المخده نفسها بدون تغيير الغطاء لفترات طويلة.
إنتِ كل ليلة بتختي وشك فوق دهون، عرق، بقايا كريمات وغبار متجمع.
غيري غطاء المخدة مرتين بالأسبوع على الأقل.
ثالث حاجه:
تلمسي وشك طول اليوم بدون ما تحسي.
الموبايل، الباب، القروش، وكل الحاجات البتمسكيها بتنقل أوساخ لبشرتك مباشرة.
قللي لمس الوجه ونظفي شاشة الموبايل باستمرار.
أكبر مشكلة إنو أغلب الضرر ما بيظهر فوراً…
لكن بعد فترة تلاقي بشرتك تعبت فجأة وإنتِ مفكره إنك مهتمة بيها.....
في بنات بستخدمو أغلى سيروم… وبعد دا كلو بشرتهم ما بتستفيد منو نص الفايده.
السبب؟ الترتيب الغلط.
البشره ما موضوع “تختي المنتج وخلاص”
كل خطوه بتفرق، ولو عرفتي الترتيب الصح حتحسي بالفرق فعلياً.
مثلاً:
لو استخدمتي بخار خفيف قبل السيروم، المسام بتكون أنضف والبشره ألين، فامتصاص السيروم بكون أحسن بدل يقعد فوق الجلد ساي.
لكن البخار الكتير أو السخن شديد؟ ممكن يهيّج البشره ويعمل جفاف.
الروتين الصح البسيط:
غسول مناسب لبشرتك
عشان ينضف الدهون والأوساخ بدون يجرّد البشره.
بخار خفيف ٣–٥ دقايق
يفتح البشرة شويه ويساعد المنتجات تدخل أحسن.
السيروم
في اللحظه دي البشره بتكون جاهزه تستفيد منو فعلاً.
مرطب
عشان يقفل الترطيب داخل الجلد وما يخلي البشره تنشف.
فازلين بكميه بسيطه في المناطق الجافه
خصوصاً حول الفم أو تحت العين لو عندك جفاف، لأنو بيساعد يحافظ على الرطوبه وما يخليها تتبخر بسرعه.
الطريقة البتستخدمي بيها المنتج مرات أهم من المنتج بحد ذاته. ♡
بتعملي ماسكات من البيت وتفكري إنك كدا بتعالجي بشرتك؟...
ما كل حاجة طبيعية معناها آمنة… وما كل وصفة منتشرة معناها مفيدة لبشرتك...
زمان كان في معتقد إن الليمون، بيكربونات الصوديوم، أو خلطات المطبخ كلها “حل سحري” للبشرة…
لكن الحقيقة الصادمة إن في حاجات ممكن تديك نتيجة لحظية، وبعدها تسيب ليك مشاكل أكبر: تهيّج، جفاف، تصبغات، وحتى ضعف في حاجز البشرة...
بشرتك ما حقل تجارب.
البشرة ليها علم، ليها توازن، وليها احتياج مختلف من شخص للتاني....
ايوا في مكونات طبيعية ممكن تفيد…
لكن برضو في حاجات طبيعية لو استخدمتيها غلط ممكن تضر أكتر من ما تنفع....
الوعي هنا مهم:
ما أي ترند على السوشيال ميديا معناها تمشي تطبقيه.
وما أي “خلطة” معناها تناسبك إنتي....
العناية بالبشرة مامجرد عشوائية… اختيار واعي، مبني على فهم، م تجارب....
خلي بشرتك تكون مساحة اهتمام… ما مساحة مغامرات... ♡
لو بشرتك باهته رغم إنك ماشيه على روتين ممتاز… ممكن السبب يكون العنف بغير قصد.
كتير من البنات بيحبو الإحساس بالنظافة القوية، فيستخدموا ليفة، سكراب، أو يفركوا بشرتهم بقوة كل يوم… وهم فاكرين دا مفيد.
لكن علمياً، الفرك الزايد بيعمل micro-tears (خدوش دقيقة جداً) في الجلد، ودي بتأثر على الحاجز الطبيعي للبشرة.
النتيجة:
تهيّج واحمرار
حبوب بتظهر فجأة
حساسية لأي منتج
جفاف رغم الترطيب
المشكلة إنو الضرر دا ما بيظهر فوراً، لكن مع الوقت بيظهر.
خففي الفرك، وخلي الغسيل يكون بلطف
استخدمي سكراب مرة أو مرتين في الأسبوع بس
تجنبي أي حاجة “قاسية” على البشرة
اعتمدي على غسول مناسب بدل الدعك
أحياناً اللطف مع بشرتك بيدي نتيجة أحسن بكتير من القسوة عليها....♡
في عامل صامت ممكن يخلي بشرتك تفشل… حتى لو روتينك ممتاز...
كتير من الناس بيركزو على المنتجات: غسول، سيروم، كريمات… لكن بيتجاهلوا حاجة أساسية جداً وهي حبيبات الغبار.
الغبار هو عبارة عن جزيئات صغيرة جداً بتستقر على سطح البشرة طول اليوم. الجزيئات دي بتدخل داخل المسامات، وتختلط مع الدهون، وبتكوّن طبقة بتأثر على صحة البشرة بشكل تدريجي....
النتيجة ما بتكون فورية، لكن مع الوقت بتلاحظي:
– بهتان في لون البشرة
– ملمس غير ناعم
– ظهور حبوب بدون سبب واضح
المشكلة الحقيقية إنو حتى أفضل المنتجات ما ح تشتغل بكفاءة لو البشرة نفسها مغطاة بطبقة من الغبار...
العناية بالبشرة ما بس منتجات، هي أساساً نظافة منتظمة:
– تنظيف البشرة مباشرة بعد الرجوع من الخارج
– اختيار غسول مناسب لنوع البشرة
– الحفاظ على ترطيب البشرة
لو تجاهلتي تأثير حبيبات الغبار، أي روتين عناية ح يفقد جزء كبير من فعاليته..
البشرة النظيفه هي الأساس لأي نتيجة حقيقية.......
بشرتك زعلانه منك.....
إنتي مفكرة بشرتك محتاجة غسول وكريم بس؟
لا يا جميلة… في حاجة أهم من كدا بكتير
بشرتك بتتأثر بـ طريقة تعاملك معاها نفسياً
أيوا والله… الضغط، القلق، وحتى طريقة كلامك عن نفسك قدام المراية، كلها بتظهر في وشك!
لما تقولي: "أنا بشرتي بايظة"
"أنا شكلي تعبانة"
دماغك بصدق… وجسمك بترجم دا تعب في البشره 😶
عشان كدا فجأة تلقي :
حبوب بتطلع فجأة
بهتان بدون سبب
دهنية أو جفاف زيادة
الحل جربي أسبوع بس:
وقفي جلد الذات
لما تشوفي نفسك في المراية قولي كلمة حلوة
نومي كويس (دي أهم من أي سيروم!)
خففي التوتر حتى لو بشوية ضحك
صدقيني… بشرتك ح تتغير بطريقة ما متوقعة
لأنو الجمال ما بس منتجات…
الجمال بيبدأ من جوا وبطلع برا...♡
بشرتك بايظة؟!!
غالباً المشكلة في إختيارك!
ما أي غسول او سيروم ينفع لبشرتك..
لو ما عرفتي نوع بشرتك، إنتي كدا بتهلكيها وبتتعبيها زيادة...
اختاري الصح حسب نوع بشرتك...
دهنية:
غسول ينضف الدهون + سيروم Niacinamide + مرطب خفيف
جافة:
غسول مرطب + سيروم Hyaluronic + مرطب تقيل
مختلطة:
غسول متوازن + سيروم خفيف + مرطب
حساسة:
غسول gentle + سيروم مهدئ + مرطب بدون عطور
بشرتك ما محتاجة كمية منتجات… محتاجة اختيار صاح.....
Click here to claim your Sponsored Listing.
