Biolla Blida

بوست مفتوح للاجابة على اسئلتكم بخصوص البشرة و الشعر لي عندها استفسار تعلق
بيولا ☘️

الحرائق تلتهم الجزائر 💔
طمنونا عنكم
اللهم بردا و سلاما على بلدنا الغالي
بيولا☘️

قبل السباحة 🏊متنساوش تحطو واقي شمس🌅 يكون SPF+50 , يحمي من الاشعة UVA UVB و مكتوب عليه resistent à l'eau يعني مقاوم للماء ويتجدد كل ساعتين ✌️ وبعد السباحة لي تحرقو يديرو مرهم بيافين او جال الالوفيرا و مكلاه ديرو الخلطات و لا المقشرات فالوجه خاصة الكيميائية أما الشعر ادهنو الاطراف تعو بالفازلين قبل السباحة باش تغلفو الشعرة و تحموها .
بيولا ☘️

عندك تساقط شعر ، شعرك كان لاباس ولا متعرج و متقصف و ناشف ، عندك فشلة و اكتئاب و تحوسي غير ترقدي و ظهرك يوجع كي تمشي بزاف
متروحيش تحوسي عالخلطات ديري تحاليل مخزون الحديد و فيتامين دي راح تلقايهم طايحين لازملك تعالجي ملداخل ماشي من برا 🤌ومكاش شامبو يطول الشعر ولا ينحي التقصف الشامبو العادي مهمتو التنظيف و فك التشابك احيانا فقط مشي علاج ( بدون احتساب الشامبوهات العلاجية )
بيولا☘️

هذيك لي راهي تخرج بلا واقي شمس فهذ الشلياطي مبعد جي عندي نلقالها حل للتصبغات و الاسمرار اخطيني مادام 🙂

تذكير : لي تحب روتين احترافي للبشرة + نظام غذائي باب الاستشارة الخاصة مفتوح الرسوم 500 دج فقط عبر CCP او بريدي موب
بيولا☘️

اليوم رح نمدلكم وصفة من ذهب ق.نبلة تع ليفيتامين و المعادن والالياف و اهم حاجة رخيسة مهيش غالية قبل منمدهالكم نقوللكم فوائدها:
اذا كنتي عندك انقطاع شهية فالصيف ومن النوع لي تحكمو لانيمي و لا نقص الحديد رح تساعدك بزاف باش تدي احتياجاتك اليومية تع الطاقة زيديلها انو تحميك من امراض القلب، السرطان ،تنقي الكبد و تساهم فزيادة نسبة الڨلوتاثيون لي هدرنا عليه مقبل و ترطب الامعاء و تزيد البكتيريا النافعة فيها، تقدري تستعمليها ثاني للتخسيس و لي مهبلينها ولادها ميحبوش ياكلو الخضرة تساعدك ثاني وحتى لي تمارس الرياضة مكاش احسن منها لكسب الطاقة اما البشرة لوكان جات تنطق راح تشكرك عليها من كثرة مضادات الأكسدة لي فيها خاصة فيتامين سي ، زيديلها انو تحسن صحة المفاصل و تنقص الكولسترول الضار وتحمي القلب و تعاون الكلاوي و تحميك مالحجر لي يجي فيهم و تساعدك تحسني ريحة الفم و تنظملك حتى السكر تصورو هذو غاع فوصفة وحدة سهلة.

الوصفة كالتالي : تحتاجي ربطة سلق ( سبانخ) ، ربطة معدنوس (بقدونس) ، ربطة كرافس (كرفس) ، عصرة نص حبة ليمون, ملعقة او زوج ملاعق كبيرة عسل النحل الحر ( لازم حر مديروش عسل عادي و مديروش السكر بصك الفايدة تروح غاع اذا متقدروش تجيبوه استحملو الطعم المر خير )
اغسلو الربطات هدوك تحت الما بارد ميكونش سخون باش تنحو كاش تراب ولا حشرات فيهم بعدها تدو الاوراق تع السلق و الكرافس بلا اغصان و المعدنوس شويا ورق شويا اغصان رقاق مشي الخشان و تقطعوهم في ثلاثة بالموس رقاق و تحطوهم فالميكسور تزيدو كاس كبير ماء و ميكسيوهم حتى يولو عصير اخضر و يختفيو الاوراق هذوك كي تكملي تعصري كلش زيدي عصرة الليمون و العسل و خلطي بملعقة الاحسن تكون خشبية مشي حديد راح جيكم كمية اكثر من كاس تشربو نتوما و لافامي ولي تشرب وحدها مديريش ربطة اكيد ديري شطيبات من كل حاجة قيس كاس .
تشربو كاس واحد يوميا ، اذا حابين تنقصو الوزن يتشرب قبل الوجبة و اذا العكس بعد الوجبة , طعمو يجيكم بيزار مع لول بصح ممكن تقبله بالعسل يجوز ،ويساعدكم بزاف خاصة الناس لي متحبش السلق ولا الخضر الورقية اعتمدوه فبلاصة لي تشربو الڨازوز اشربو هذا تربحو صحتكم و تزيان بشرتكم بدون مكملات غذائية ولي عندهم البواسر مصارنكم يرطابو اذا لاحظتو القطط ياكلو الحشيش ليس عن عبث ياكلوه كي يكون عندهم مشكل هضمي مع انو حيوانات لاحمة تعلمو من خلق ربي . بارطاجيو هذ المنشور ماكسيموم فراشاتي ليستفيد الجميع خاصة اصحاب فقر الدم ولي جرباتو بعد شهر شهرين ترجع لهنا و تخلي رأيها.ملاحظة الحوامل مديروش المعدنوس
اذكر المصدر بحالة اعادة النشر
بيولا☘

كيفاش نحافظو على صحة امعاءنا وبالتالي يظهر التحسن على بشرتنا؟الحل طبعا هو فماكلتنا يعني اي حاجة تدخل في فمك شوفي فيها مليح مليح و ديري حساب انو رح تأثر في بشرتك بوقت لاحق .باش تحسني صحة امعاءك رح تسحقي 10 حاجات:
1- الألياف : فالفواكه تلقاوهم فالبرتقال التفاح التوت اما فالخضروات تلقاوهم فالزرودية و السلق و اي حاجة لونها اخضر و الحبوب تصيبوهم فالشوفان ، والأرز البني هذو فيهم بزاف الياف .
2- البروبيوتيك كيما الرايب لي فيه بكتيريا نافعة تعزز صحة الأمعاء (لكن ممنوع للي عندهم بشرة دهنية )
- الكرنب المرقد فيه بكتيريا مفيدة شوفو فاليوتيوب كيفاه يترقد واخدموه.
3- السوائل: اهم سائل هو الماء باش ترطبو الجسم و الخلايا و ايضا تحسنو صحة الامعاء بعدو يجي التيزانات كيما تيزان الزنجبيل و النعناع روعة لتهدئة الجهاز الهضمي و ثالثا عصائر الفواكه الطبيعية كيما البرتقال و التفاح
- فيتامين سي : موجود في الفراولة، البرتقال والفلفل الرومي روعة يساعد في حماية البشرة من الأكسدة.
- الأوميغا 3: موجود في الأسماك الدهنية مثل السلمون، وبذور الشيا، والجوز.التونا ، يعزز صحة البشرة ويقلل الالتهابات.
- الزنك: تلقاوه فاللحم البقري، والحميصة
- النشاط البدني : تقدرو تمارسو اليوغا او تمارين رفع الاثقال بالنسبة للرياضيين اما لي معندهمش وقت عالاقل مشية نص ساعة فاليوم تفيدكم
6- النوم الجيد خاصة رقاد الليل مهم للبشرة
7- تقليل التوتر لانو الدماغ كي يكون مشي مرتاح باقي اجهزة الجسم مراحش تخدم مليح و حتى الهرمونات يصرالهم خلل و يخرجو الحبوب و المشاكل غاع .
8- الابتعاد تماما عن تناول المضادات الحيوية (لونتيبيوتيك ماشي غير تسعلو و تمرضو لاڨريپ تروحو للفارماسي تشروهم لانهم سلاح ذوحدين و يتشرا فقط بوصفة طبية)
9- اذا عندكم مرض معين بالجهاز الهضمي حاولو تعالجوه عند الطبيب المختص
10- اكيد الابتعاد عن الأكل الغير صحي خاصة المعلب رح يساهم بنسبة كبيرة فالتحسن تع امعاءكم
اذا تبعتو هذ الروتين مدة شهرين راح تكونو حميتو امعاءكم و حسنتو الوظيفة تعهم و بالتالي ينقصو الحبوب و مشاكل البشرة ( طبعا اكيد لازم تكونو محافظين عالروتين الخارجي الصحي المناسب لنوع البشرة)
تابعيني للمزيد من نصائح بيولا ☘️
اذكر المصدر بحالة اعادة النشر

علاقة الأمعاء بالبشرة 🙏☘️
هذا المنشور يهمك جدا انتي لي تعاني الحبوب, حب الشباب ،بهتان البشرة، هالات , تجاعيد مبكرة ، تحطي الكريمات و جربتيها كلها و منفعتش معاك ولا غير تحبسيها ترجع المشاكل هل خممتي انو المشكل ليس في وجهك بل من أمعائك ؟
الجلد هو عبارة عن حاجز دفاعي اول للبكتيريا يعني راه يتبع الجهاز المناعي و ربي صنعو بطريقة يبانو فيه علامات على امراض داخلية بلا بيها مراحش نفيقو بلي رانا مراض الا بعد فوات الاوان .
الجلد اذن تابع لجهاز المناعة و كامل نعرفو انو المناعة نكتسبوها من الأكل تعنا و بالتأكيد الامتصاص تع الفيتامينات و المغذيات الضرورية لجلدنا يكون على مستوى الجهاز الهضمي ، اي مشكل يصرا فهذ الجهاز رح يصرا بالتالي مشكل على مستوى الجلد ، من بين المشاكل لي تخرب صحة الامعاء تعنا الغذاء الغير صحي، تناول المضادات الحيوية دون وصفة طبية ، نقص النوم ، عدم ممارسة الرياضة ، و الاجهاد ، الاختلالات الهرمونية هذو يقتلو البكتيريا المفيدة لي في مصارنا و بالتالي يصراولنا التهابات جلدية و حب الشباب الخ هذي اشارة ان الامعاء تعنا في خطر و المشكلة الرئيسية مهيش فالوجه.
ثانيا ، الناس لي عندها مشاكل فامتصاص الامعاء للمغذيات او مرضى السيلياك لي هو مرض يخلي الجهاز المناعي يهاجم الأمعاء الدقيقة كي ناكلو الغلوتين يعني اذا حبينا جلد دون مشاكل لازم يكون امتصاص المغذيات 100% .
ثالثا, اذا كنتي تعاني من قولون عصبي، عسر هضم، اي مشكل اخر اكيد رح تعاني من حب شباب او التهابات ومشاكل بالبشرة
رابعا، نقص امتصاص الحديد ، اذا كنتي تاكلي مليح ،و تاخذي مكملات حديد و مزالك تعاني من فقر دم ، بهتان فالبشرة، هالات سوداء ، صعوبة فالتئام الجروح ، هذو غاع علامات انو امعاءك مهيش تمتص الحديد .
- عندك قشرة شعر، جفاف جلدي وتقشر، عدم تحمل لضوء الشمس ، هنا راكي تعاني من سوء امتصاص الدهون بالتحديد اوميجا 3
-اذا كان امتصاص الفيتامين سي سيئ الكولاجين مراحش يتكون و رح يتكمش وجهك و يخرجولك تجاعيد مبكرة .
وكاين بزاف امثلة ، كيما قال ابن سينا المعدة بيت الداء " حبيت نفهمكم انو الجلد هو مرآة لواش صاري لداخل لهذا اعتنوا بصحة الأمعاء تعكم خاصة لي عندهم حب شباب اذا داويتو الامعاء على ضمانتي رح تتحسنو .
تابعيني للمزيد من نصائح بيولا ☘️
اذكر المصدر بحالة اعادة النشر .