Captain Shimaa Elbadrawy

لما اشرب شاي أخضر واقعد اتخيلهم وهما بيقولوا
الرفيعه راحت والرفيعه جت 🤭
😂😂😂😂

هو انتو ليه بتتعاملوا مع دهون جسمكوا زى مابتتعاملوا مع دهون المواعين و فاكرين انه المياه السخنه بليمون هتدوبها 😂😂😂

اللى بيحرق الدهون هو تظبيط الاكل وممارسه الرياضه وبسسسس 👌👌

😍

🌻

بوست طويل شويه بس مهم جدا 👌.
دي شوية نصايح كده للناس اللي عاوزه تخس ومش عارفه تبدء منين وتبدء ازاي...
عاوزاكي تعرفي ان الموضوع مش صعب ابدا
هتبدئي واحده واحده وهتصبري ☝ومتستعجليش عالنتيجه خالص
ولازم هتبذلي شوية مجهود علشان تحسي بحلاوة النتيجه وتحسي بالانجاز اللي هتعمليه 🔥🔥
هيكون في عندك حاجات اساسيه بتعمليها خلال يومك هو ده اللي هيوصلك لهدفك 👌
= اعرفي ان لازم يكون هدفك هو صحتك في المقام الاول علشان كل ماتكبري ف السن بتحتاجي لاكل صحي اكتر علشان يحافظ علي شعرك وبشرتك وجسمك ومناعتك وعضمك ونشاطك 👆
وبعدها تدوري علي انك تقللي وزنك وبرضو يكون هدفك هو صحتك وانك بتخسي علشان نفسك مش علشان حد 🌻
علشان تشوفي نفسك حلوه مش علشان تنولي رضا الناس 🌻
= اشربي كل نص ساعه او ساعه بالكتير كوباية ميه كبيره 🍺
الميه مهمه جدا فوق ماممكن تتخيلي و تعتبر اهم عنصر في العناصر الغذائيه اللي معظمنا تقريبا بيهملها تماماً 😔
= هتهتمي بالاكل المفيد الصحي 🍉🍋🍓🌽
وتبعدي عن الاكل اللي ملوش لازمه🍕🍔🍟🍰
ابعدي عن اي حاجه مصنعه وخليكي ف الحاجات الطبيعيه اللي ربنا خلقها
امنعي السكر والعيش لو تقدري ولو متقدريش قللي كمياتهم خالص قدر المستطاع ✅
العيش والسكر مش بيتخنونا بس .. لاء .. دول بيخلو الجسم دايما في حالة جوع نظرا لانهم بيرفعوا انسولين الدم وبيتهضمو بسرعه
فيتخنونا وميشبعوناش 😔
السكر بكل اشكاله لو بنحطه ف المشروبات او بناكل حلويات وشيكولاتات 👀
كمان المخبوزات والمكرونه واي شئ مصنوع من الدقيق الابيض يعتبر نشويات بسيطه زي السكريات بالظبط
وبيعمل ف الجسم نفس عمل السكريات
بيعلي سكر الدم والانسولين يزيد والجسم يخزن دهون

= اعرفي ان البطن مش بتتئمر .. احنا اللي بنتئمر عليها يعني لو ادتيها طبق سلطه هتشبع لو ادتيها ساندوتش برجر هتشبع
اختاري ايه اللي ينزل فيها ويفيدك وف نفس الوقت تكون سعراته قليله 👌👌
= متمشيش علي نظام دايت ممل علشان مش هتكملي فيه وهتزهقي😏 .. الافضل انك تغيري نظام حياتك لنظام صحي صدقيني هيفرق كتير جدا معاكي وهتدعيلي 😉
انا اكتر حد كنت ماشيه بنظام غلط في الاكل وكنت باكل من بره بغباء وبشرب بيبسي طول الوقت وباكل حلويات وسكريات وشيبسي بكميات عبيطه .. انا بنصحكم من واقع تجربتي ومن اللي مريت بيه فعليا 😍
= متحرميش نفسك من حاجه .. كلي كل حاجه لكن اتعاملي مع جسمك بذكاء
لو نفسك في اي حاجه سعراتها عاليه كلي منها حته صغيره وامشي بمبدء (شويه زي كتير )
متعة الاكل بتتمثل في النص دقيقه اللي بنمضغه فيها وبعدين بينزل في معدتك وتبدء المأساه 😄
= اوعي تجوعي ☝..
متسيبيش نفسك تجوعي ابدا لان لو جوعتي اللي هيحصل كالتالي
هتاكلي اي حاجه تيجي ادامك وتعكي الدنيا
لو قعدتي اوقات كتير جعانه ظناً منك انك بكده هتخسي فاللي هيحصل العكس تماما لان الجسم ساعتها هيحس بالخطر ويبدء يخزن دهون فبدل ماتخسي هتلاقي نفسك بتتخني وانتي مش فاهمه ايه اللي بيحصل فبالتالي هتصابي بالاحباط لانك هتحسي انك حرمتي نفسك وجوعتي كتير وعملتي كل اللي ف وسعك وبرضو مخستيش
والحقيقه انك كنتي بتتعاملي مع جسمك غلط ❌
لو مابين الوجبات حسيتي بالجوع خدي اي نوع فاكهه او خضار
تفاحه.. خيارتين.. جزرايه... خس.. جوافه
= متحرميش جسمك من اي عنصر غذائي ظناً منك انك كده هتخسي ❌
الجسم محتاج كل حاجه دهون وبروتين والياف وكاربوهيدرات وماء
وبناخد طبعا الصحي منها 💯
= مفيش اكل ربنا خلقه ممنوع الا ف حالة انه غلط عليكي صحيا بأمر طبيب
يعني اللي يقولك متاكليش مانجه وعنب وتين وبلح ده تمشي من جمبه كده ف هدوء وتسدي ودانك 😂
اي حاجه طبيعيه ربنا اللي خالقها معدتش علي مكنه ومش مصنعه تاكليها وانتي مطمنه
المهم عندي تحددي كمياتك وتفهمي انتي بتاكلي ايه وسعراته اد ايه
يعني مانجايه ف اليوم مش هتعمل حاجه
عنقود عنب صغنن الدنيا مش هتتهد
بلحتين او ٢ تين برشومي زي الفل
والتين اصلا من الفواكه المفيده جداااااا وكمان ذكر ف القران
بس طبعا مش علشان قلت انه تمام تعملي طبق فاكهه زي بتاع ابو لهب وتمليه 😂😂😂
اهم حاجه الكمياااااات فقط
= لعب الرياضه .. لو اتكلمت عن مدي اهميتها بجد هفضل اكتب طول عمري
يكفي اقول ان مفيش حاجه ظبطتلي جسمي بجد قد لعبي للرياضه
الرياضه مهمه جدا جدا 👍👍
صحيا ونفسيا وجسمانيا
روحي جيم .. امشي عالبحر .. العبي ف البيت 💪
اي طريقه المهم تلعبي رياضه .. حتي لو ربع ساعه ف اليوم هيكون افضل من انك متلعبيش خالص
عودي جسمك عالمجهود .. ده هيعلي حرقك وهيزود قدرة التحمل عندك وهيزود مرونة جسمك ولما تشوفي وتحسي بالنتيجه مش هتبطلي لعب طول حياتك
الرياضه بتحسن حالتك النفسيه والمزاجيه لانها بتحرق الادرنالين المسئول عن مشاعر الحزن والغضب والتوتر عندك 😌
وتعلي من هرمون الاندروفين والدوبامين ودي هرمونات السعاده.. اللي كلنا محتاجين لها طبعا 😍😍
العبي الصبح اول ماتصحي ده هيحافظ علي نشاطك طول اليوم وهيدي اشارات لمخك ان جسمك حرقه عالي فيحافظ علي حرق عالي طول اليوم 😎
او في نص اليوم بس يكون بعد الاكل بساعه ونص او ساعتين
التمارين الافضل علي الاطلاق هي تمارين المقاومه 💪💪 علشان تزودي الكتله العضليه عندك بالتالي جسمك يتشد وحرقك يعلي وبرضو مع تمارين المقاومه العبي كارديو ( الكارديو حلو بيعلي الحرق وبيضيع الكرش الجميل 😁)
نوعي مابين التمارين علشان تحققي اقصي استفاده لجسمك
والمشي جميل جدا جدا يابنات
بيشد الجسم ويعلي الحرق ويحسن من الحاله النفسيه والمزاجيه وياسلام لو كان عالبحر 😍😍
= البنات اللي هتروح الجيم رجاءا رجاءا متفرميش نفسك تمرين بالساعتين والتلات ساعات وتقولي علشان اخس بسرعه
غلط ❌
التمرين الصح بيكون اقصاه 90 دقيقه
اكتر من كده الجسم بيبدء يخزن دهون نتيجه لافراز هرمون اسمه الكورتيزول
اتمرني ساعه بالكتير والاهم هو المواظبه
متقوليش هتمرن بقا ساعتين تلاته علشان اخس اسرع وتلاقي نتيجه عكسيه فتحبطي 😔
علشان كده بأكد دايما اننا لازم نتعامل بذكاء 👌
= نامي بدري لو سمحتي علشان السهر بيقلل الحرق وبيقلل من افراز هرمون النمو اللي هو اساسي في عملية الحرق 😑😑
انا بكلمكم من واقع تجربه انا عشتها بنفسي يعني حاسه بكل واحده وزنها زياده ولما غيرت شوية حاجات في نظام حياتي بجد حياتي اتغيرت وشكلي اتغير
ومن بعد مادخلت في مجال الفيتنس وبدأت ادرس واقري كتير فيه بدأت افهم الموضوع بشكل صح واكتشفت عادات غلط كتير كنا مصدقينها وبنتعامل بيها طول الوقت ( هبقي انزلهالكو في بوست منفصل ) 😉

ياريت كل بنت تقرا الكلام ده تحاول تطبقه علي قد ماتقدر 😘
انا بجتهد قدر المستطاع وبحاول اوصل الصوره ليكو في ابسط اشكالها 😍

لو اي حد عنده سؤال انا تحت امره .. لو اي حد عاوزني اتابعه عالماسنجر او عالواتساب انا تحت امره .. لو اي حد محتاج حد يشجعه ويحفزه انا تحت امره ابعتولي عالخاص
اتمني اكون قدرت افيدكم

😍

🌻

قواعد الدايت ال 20

1-متعمليش دايت 😂😂

2- متقوليش لحد انك عامله دايت.. وخصوصاً ماما 😄 علشان روح الشيف شربيني بتحضر عليها وتلاقي صواني داخله وصواني خارجه.. والانسان ضعيييف 😄

3 - متستعجليش ابدا انك تخسي.. اصبري وخدي وقتك وهتوصلي لهدفك باذن الله 🥰

4- الغي من قاموسك كل ماهوه مُصنع وقولي مرحبا لكل ماهوه من خير الطبيعه
يعني بلاش نسكافيه وخليها قهوه
بلاش مكرونه وخليها ارز.. او قللي مكرونه يعني
كلي الفاكهه صحيحه افضل وافيد من لما تعمليها عصير
بلاش طبعا عصاير جاهزه كلها سكر والبيبسي ده انسييييييه
اي حاجه مرت بخطوات تصنيع وعدت علي مكن قبل ماتوصل لايدك ابعدي عنها
وخلينا مركزين في القطفه الاولي 👌

5 - في ركن في الدولاب كده اسمه لما اخس 😄 اشتغلي علي نفسك لحد ماتوصليله ارجوكي

6- البطن مش بتتئمر احنا اللي بنتئمر عليها .. يعني اديتها برجر هتشبع اديتها بيض مسلوق هتشبع.. اختاري اللي هتديهولها

7-غيري نظام اكلك لنظام صحي نسبيا هتلاقي صحتك بقت احسن.. بقي عندك نشاط.. بشرتك نضره.. شعرك بيطول.. ونفسيا افضل بكتير

8- لما نظام اكلك هيبقي صحي لما تيجي تعكي عكايه ف النص مش هيبقي في مشكله كبيره
و مش هتعرفي تكملي العكايه للاخر اصلا علشان معدتك هتبقي اخدت علي نظام معين واحتمال كبير اصلا توجعك

9- الاكل الصحي مش مسلوق وسوتيه بس.. في طرق كتير للاكل الصحي وشهيه جدا جدا 😍

10- الاكل الصحي بيشبع اكتر من الاكل اللي مش صحي

11- اتحركيييييييي.. امشي.. نطي.. ارقصي.. اتمرني.. روحي جيم.. المهم نسيب الكنبه شويه ابوس ايدك

12- حاولي متسهريش كتير علشان ده بيلغبط هرمونات الجسم وبيدي فرصه لجسمك انه يخزن دهون والسهر بيخلينا ناكل وقصه حزينه كده 😃.. متسهريش النوم البدري حلو والله

13- اشربي ميه كويس جدا متنسيش 👌

14- الاكل بليل مش بيتخن ولا حاجه.. اهم حاجه متاكليش كميات كبيره بليل ونبعد عن الحلويات والنشويات.. الفاكهه والزبادي حلوين برضو والله 😄 ويبقي قبل النوم بساعتين علي الاقل

15- متركزيش في الميزان خالص.. ركزي في مقاساتك 👌

16- كلي ببطئ وامضغي الاكل كويس هتحسي بالشبع بسرعه

17- شويه زي كتير.. لو نفسك راحت لاي حاجه حلوه خدي منها حته صغننه واشبعي رغبتك.. متعة الاكل بتكمن في ال20 ثانيه اللي بنمضغه فيه وافتكري دايما ان (شويه زي كتير)

18- مفيش فاكهه ممنوعه في نظامك.. المهم اعرف باكل ايه وسعراته اد ايه
يعني كلي مانجه وموز وبلح وتين.. لكن بكميات قليله 👌

19- مفيش اكل بيخسس ولا مشروبات بتحرق ولابرشام سحري
في اكل سعراته قليله وقيمته الغذائيه عاليه فبيحسسني بالشبع لفتره اطول
في مشروبات مفيده لجسمي وصحتي وممكن تعلي نسبة الحرق بس بنسبه بسيطه جدا
البرشام ده ارميه ف الزباله

20- بدلي كلمة دايت ب غيرت نظام اكلي او مقلله كمياتي او بظبط اكلي.. كده يعني

صحتك بالدنيا.. حافظي عليها🌻
😍

🌻

😲😲😲

لايك وفولو لصفحتي علشان يوصلكم كل جديد ❤

تعرفي ان معلقه واحده من السمسم تعادل شرب كوب من اللبن
السمسم من اهم مصادر الكالسيوم اللي بيحتاجها الجسم نتيجه لاحتوائه علي نسب عاليه من الكالسيوم وده بيكون مناسب جدا لمرضي حساسية الالبان
بالاضافه كمان لاحتوائه علي الدهون الصحيه اللي بيحتاجها الجسم
وكمان بيحتوي علي الزنك والماغنيسيوم والنحاس وفيتامين ب 1 المهمين جدا لصحة العظام والمفاصل وقوتها
بيحسن مستوي ضغط الدم وبيعزز مناعة الجسم وبيقلل مستويات الالتهابات في الجسم زي التهاب القولون او التهاب المفاصل وبيقلل من نسب الكوليسترول الضار
انصح بتناول معلقتين كبار سمسم ابيض يوميا للحفاظ علي عظام قويه للكبار وللاطفال ايضا
وممكن وضع السمسم علي السلطات وعلي الجبن واستخدامه في مختلف الوصفات الغذائيه

🌻

تعرفي ان معلقه واحده من السمسم تعادل شرب كوب من اللبن
السمسم من اهم مصادر الكالسيوم اللي بيحتاجها الجسم نتيجه لاحتوائه علي نسب عاليه من الكالسيوم وده بيكون مناسب جدا لمرضي حساسية الالبان
بالاضافه كمان لاحتوائه علي الدهون الصحيه اللي بيحتاجها الجسم
وكمان بيحتوي علي الزنك والماغنيسيوم والنحاس وفيتامين ب 1 المهمين جدا لصحة العظام والمفاصل وقوتها
بيحسن مستوي ضغط الدم وبيعزز مناعة الجسم وبيقلل مستويات الالتهابات في الجسم زي التهاب القولون او التهاب المفاصل وبيقلل من نسب الكوليسترول الضار
انصح بتناول معلقتين كبار سمسم ابيض يوميا للحفاظ علي عظام قويه للكبار وللاطفال ايضا
وممكن وضع السمسم علي السلطات وعلي الجبن واستخدامه في مختلف الوصفات الغذائيه

🌻

الست عاوزه حاجتين
متتخنش
ومتتخنش

علشان مزاجك يبقي احسن 🌻
اتمشي كل يوم من 20ق ل نص ساعه 🚶‍♀️🚶‍♀️🚶‍♀️