Be Healthy with Maha

هو انا عشان اعمل دايت لازم انزل و اروح و أجي مينفعش الدايت يجيلي لحد عندي ؟
لا ينفع عادي لأنك ممكن تتابع معايا و انت قاعد عالكنبه في البيت و تبقي وفرت فلوس المواصلات و وقت الانتظار و سعر المتابعه كمان أقل من العادي

الجميل ده مهدور حقه في المجتمع عشان كده لازم نتكلم عنه
الحرنكش من الفواكهه الغنيه بالفوائد و قليلة السعرات يعني عندك ال١٠٠ جرام يعملوا ٧٧ سعر حراري لكن فيه كمية ڤيتامينات و معادن بتديله فوائد كتيره جدا زي
١-بيزود المناعه
٢-مضاد للأكسده و واقي سرطاني
٣-بيحمي من تليف الكبد و الكلي
٤-بيقلل ألم المفاصل
٥-بيحسن النظر
٦-بيقلل الألتهاب خاصة ألتهاب القولون
٧-بيحمي العظام من الهشاشه
٨-بيحمي من الأمراض القلبيه
٩-بيزود معدل تصنيع كرات الدم الحمراء
١٠-مفيد جدا للحوامل
يعني تاكل منه الصبح أو بليل أما وحش الجوع يسيطر عليك و أنت مطمن إنه مش هيتخنك في نفس الوقت هيشبعك و يبسطك

من المشروبات الحلوه في الشتاء الكركديه السخن
غير طعمه الحلو الكركديه من النباتات المفيده جدا لأمراض كتير زي
١-مرض السكر لأنه فيه ماده بتقلل امتصاص النشويات من الأمعاء بالتالي بتمنع ارتفاع السكر في الدم
٢-الضغط المرتفع لأنه بينزل المياه من الجسم
٣-السرطانات لأن صبغة Anthocyanin اللي بتديله اللون الأحمر مضاده للأكسدة و كل ما كان اغمق كل ما مفعوله بقي أقوي
٤-السمنه لأنه بيحتوي علي حمض اسمه hydroxy citric acid و ده بيمنع تصنيع الfatty acid (الدهون اللي بتتخزن في الجسم)
متجيش انت بس تحط فيه ٥ معالق سكر و تستني انه يخسسك

كل سنه و حضراتكم طيبين و في أحسن صحه دائماً ⁦⁦♥️⁩⁦♥️⁩⁦♥️⁩🎉🎉🎉⁦

٩٠% من حالات السمنه عند الأطفال سببها الإعلانات
عملوا تجربه علي اطفال من سن 7-14 سنه انهم يتفرجوا علي فيلم و بعديها يختاروا وجبه خفيفه ياكلوها و قسموا الأطفال مجموعتين ، المجموعه الاولي هتتفرج بإعلانات و التانيه بدون إعلانات
بالتالي بعد نهاية الفيلم لقوا اطفال المجموعه الأولي بتختار الوجبات اللي شافتها في الإعلانات
و تلاحظ انك لو دخلت السوبر ماركت و ابنك معاك هتلاقيه بيشبط في الحاجه اللي بيتعملها دعايه كتير في التلفزيون و الشوارع
طب هنغمي عنين العيال ولا نعمل ايه ؟
دورك هنا بقي انك متخليش الطفل يقعد يتفرج علي التلفزيون كتير و في الوقت اللي بيقعد فيه خليه دائما معاه وجبه صحيه بياكلها زي الفواكه او الفشار او المكسرات او الحلويات المصنوعه في البيت بطريقه صحيه مع كوباية عصير طبيعي لأنه لو شاف الإعلانات دي و هو بطنه مليانه الإعلان مش هيأثر معاه اوي زي و هو جعان ولا هيفتكره اما يروح السوبرماركت
كمان متاخدوش السوبرماركت و هو جعان لأنه هيعوز ياكل كل الحلويات اللي قدامه تقريباً و بكده هتبقي حليت جزء كبير من المشكله

قولنا كده تفتكر ليه اما بتعمل دايت مبتخسش او بتوصل عند وزن معين و تثبت ؟

شوربة الكرنب الحارقه للدهون و الهموم
الكرنب مفيد جداً و مليان ڤيتامينات و معادن
غير أنه مليان ألياف بتساعد علي الشبع و تقلل مستوي السكر في الدم و واقي من السرطانات و الإلتهابات يعني الكرنب حلو مفيش كلام
انما شوربة الكرنب دي بقي اول ما تشربها هتسد نفسك و تكرهك في الأكل بالتالي مش هتاكل و يمكن تخس انما مفيش ورقه علميه واحده بتقول انها بتحرق دهون ولا يحزنون
اتقي الله و أعمل دايت محترم متوازن و احرق الدهون بشكل صحي

لما الاقي حد بيتابع معايا موجود في kersh keepers

دايما في ڤيتامينات بتقع منك كده من غير ما تحس منها ڤيتامين B12 خصوصاً الأخوه النباتيين لأنه مش موجود غير في المنتجات الحيوانية
أو الناس اللي عندها مشاكل في الأمعاء أو بتاخد ادويه زي أدوية السكر اللي فيها Metformin بيقلل امتصاص ڤيتامين B12 بالتالي تبدأ تظهر عليك الأعراض دي من غير ما تبقي عارف سببها ايه و تروح تلجأ للمكملات الغذائية اللي هي اصلا بتفتح النفس للأكل عند بعض الناس ف وزنهم يزيد و عند البعض الأخر توجع بطنهم ف وزنهم يقل
طب و علي ايه ما ناخده من المصادر الطبيعيه أحسن زي الأسماك تحديداً التونه و السالمون و السردين ، اللحوم ،منتجات الألبان ، البيض تحديداً الصفار
أضعف الإيمان كل زبادي كل يوم و بيضه مسلوقه و الدنيا هتمشي

د/مها العطار

الأهم من الأكل شكل الأكل للناس اللي بتعمل دايت و كارهه أكله او حالات النحافه اللي نفسهم مسدوده أو الاطفال اللي مش بتاكل حاجه مفيده
ده فطار متكامل لطيف جدا كله علي بعضه بنشوياته ببروتينه بڤيتاميناته ٣٥٠ سعر حراري لو بتكره الجبنه القريش ف دي فرصه لطيفه جدا انكم تتصالحوا مع بعض لأن طعمها مش باين وسط الخضار و التوست و كذلك البيض المسلوق

د/مها العطار

دخلنا في فترة الفاينال اللي المفروض بيتعوض فيه لكن الحقيقه انك بتعوض وزن مش درجات
اي حد بيبقي مضغوط بيطلع غله في الأكل و طول ما هو بيذاكر بياكل و الأكل ده بيكون حاجات ملهاش لازمه غير انها سعرات عالفاضي ولا المذاكره بتخلص ولا انت بتشبع و تطلع من الامتحانات زايد كام كيلو حلوين
طب ما المذاكره بتجوع اعمل ايه ؟
١-اعتمد علي البروتين زي البيض و البقوليات و اللحوم عشان تفضل شبعان لوقت طويل
٢-كتر من النشويات الصحيه زي الموز و البطاطا هيدوك طاقه لوقت طويل
٣-خلي قدامك طبق فيه شوية مكسرات ، سلطه ، موز باللبن و شوية سوداني او زبادي بالفواكه يقلل التوتر و يحسسك بالشبع
٤-نظم وقت أكلك كل ٣ ساعات تاكل حاجه عشان متحسش بالجوع و العك يشتغل
٤-قلل شرب القهوه و النسكافيه لأنك كده بتفقد سوائل من جسمك و ضغطك هيوطى و التوتر هيزيد
٥-متاكلش بسرعه عشان ترجع تذاكر أدي كل حاجه وقتها عشان تستفيد بالأكل و تحس بالشبع

البطاطا و جمالها 😍😍
البطاطا من النشويات المعقده المشبعه جدا لأنها مليانه ألياف خصوصاً القشره مش فيها ألياف تعادل نص كوب شوفان
كمان فيها ڤيتامين أ و سي و كمية بوتاسيوم أعلي من الموز
أما الفوائد بتاعتها بقي لا تعد ولا تحصى
1-بتحافظ علي ضغط الدم
2-بتحمي الجلد و العيون
3-بتقلل تأثير سرطان البروستاتا للرجال و تقلل نسبة الاصابه بسرطان الثدي 25% عند السيدات
4-بتحمي مرضي السكر من تأثير المرض علي الأعصاب
5-بتحسن استجابة الجسم للأنسولين
6-بتقلل الكولسترول في الدم
ده غير طبعاً انها أحلي حاجه تتاكل في الشتا طبعا بعد العدس

د/مها العطار