Diet With Mo - Dr. Mohamed Khaled

Honored and incredibly proud to be part of the national team during such a massive achievement.This moment is bigger than any individual — it’s the result of hard work, sacrifice, trust, and an unbelievable team spirit shared by everyone behind the scenes.

Proud of this journey. And this is only the beginning. 🇪🇬🏆🔥

نظام الطيبات و الجدل اللي داير اليومين دول؟؟
البوست طويل شويه معلش فأعمل كوبايه شاي و تعالى أقرأ..

أولا: هل الكلام بتاع النظام ده صح بنسبه 100% ؟
للأسف لأ.. بالكتير فيه معلومات صحيحه بنسبه 10-15% فقط و دي معلومات بديهيه العلم أقر بصحتها من سنين مش حاجه جديده.. و باقي 85-90% من الكلام معلومات غلط.. مش بس
كده ده مضر جدااااا.

ثانيا: تعالوا نتكلم بشكل موضوعي عن الايجابيات و بعد كده نشرح السلبيات.

- منع الدقيق الابيض: خطوه كويسه جدا لتقليل مقاومه الانسولين و بعض انواع الالتهابات
- منع الالبان: خطوه ممتازه لمرضى حساسيه الالبان و بعض امراض القولون.
- منع الخضار الني و الخضار الورقي: خطوه مقبوله لبعض مرضى القولون و دول نسبتهم قليله مش كتير.
- تقليل عدد الوجبات و الاكل عند الشعور بالجوع: خطوه كويسه للجهاز الهضمي بس بشرط تنظيم مواعيد الاكل و عدم زياده ساعات الصيام عن 14 ساعه يوميا للحفاظ على صحة الهرمونات.
- الفراخ من المزارع: دي اكتر نقطة شائكة.. الموضوع ببساطه ان الفراخ مش واخده هرمونات و ده عشان اسباب كتير محتاجه بوست لوحده بس هي حاليا معدلة وراثيا و ده عن طريق ان المزارع بتعتمد في العلف على مصادر طاقة عالية ودهون عالية زي زيت الذره و زيت الصويا عشان يسرع النمو و ده بيزود حمض الأراكيدونيك اللي بيعمل التهابات مزمنه وأمراض كتير للاسف و بيكون نسبه الاوميجا 6 فيه اعلى بكتيييير جدا من اوميجا 3 و دي حاجه كارثيه للجسم.. ف عشان تقلل الاضرار دي محتاج تسلق الفراخ بدل الشوي و القلي في الزيت او تزود من مصادر أوميجا 3 في اكلك عشان تقليل نسبه 6 ل 3.

نتكلم عن كوارث النظام:

- مفيش حاجه اسمها اوقف اي دواء لاي مرض مزمن بدون الرجوع للطبيب و مراجعه التحاليل بحجه ان الجسم لما يوقف اكل معين مش هيحتاج دواء.. ده انتحار رسمي.
- هتقولي طيب هم زمان قبل اكتشاف الانسولين مرضى السكر كانوا عايشين ازاي؟
هقولك ببساطه مين قالك ان مكانش فيه منهم حالات كتير جدا بتموت من السكر او مضاعفاته؟
- بالعقل كده.. ازاي نظام يبقى معتمد على المربى و الحلاوه و الشيكولاته و السكر المصنع و العصاير المعلبه و المقليات و الجبن الاصفر المصنع و مزود في النشويات جدا و مقلل في البروتين جدا و مهمل دور الالياف و بتقول عليه نظام صحي و استشفائي؟؟؟
ده بالعكس .. ده اسرع نظام يزود الالتهابات و يعمل كوارث
- هتقول طيب ما فيه ناس ماشيه عليه و حاسه بتحسن؟
في الاول هتحس بتحسن عشان وقفت اغلب الاكل زي بالظبط لما بتصوم ما انت بتريح الجهاز الهضمي .. ايه الجديد؟

الخلاصه في 9 نقط:
1- عندك مشكله في هضم الدقيق .. وقفه
2- عندك مشكله في هضم الالبان .. وقفها
3- عندك مشكله في هضم الخضار .. اطبخه بدل الني
4- عندك مشكله مع اي نوع اكل وقف النوع ده حتى لو الاكل صحي.. كل واحد عارف طبيعه جسمه
5- ماينفعش تعمل select all و تمنع كل دول بحجه انك تحافظ على صحتك .. بالعكس ده انت دخلت كل الاكل المضر و قللت من الاكل المفيد اللي هيرفع مناعتك عشان تقاوم الضرر ده.
6- في ثوابت مافيهاش نقاش زي ( الافراط في : السكريات - المقليات - اللحوم المصنعه - المخبوزات - النشويات عامه بدون حساب) ده شيء مضر جدااا للجسم
7- الغذاء الجيد هو اساس الصحه .. و التغذيه السيئه بتزود من الامراض
8- مفيش حاجه اسمها توقف دوا من نفسك الا بعد الرجوع للطبيب المختص.
9- لازم تمارس الرياضه او حتى المشي عشان تحافظ على صحتك.

لو وصلت لحد هنا ماتنساش تعمل لايك و شير و لو في مواضيع تانيه عايزين اتكلم فيها اكتبوا في الكومنتات

في حد عايز يعرف رأيي في الجدل بتاع نظام الطيبات؟