GG Shopping

ដែលហៅថា《ប្តីប្រពន្ធ》លុះត្រាតែ៖
- ដឹងថាពូកែររករឿង តែស្ម័គចិត្តឱ្យរករឿង
- ដឹងថារអ៊ូ តែសុខចិត្តស្តាប់ដូចចម្រៀងបំពេ
- ដឹងថាឈ្លោះគ្នាខ្លាំង តែនៅតែលើកលែង
- ដឹងថារស់នៅពិបាក តែចង់រស់នៅជាមួយគ្នា
- ដឹងថានឹងមានបញ្ហាលំបាក តែនឹងឆ្លងកាត់ជាមួយគ្នា
- ដឹងថាហត់នឿយ តែនឹងមិនបោះបង់គ្នា
- ដឹងថាក្រីក្រ តែនឹងតស៊ូជាមួយគ្នា
- ដឹងថាមិនស្អាត មិនសង្ហាលើសគេ តែនៅតែត្រូវការគ្នា
- ដឹងថានឹងឈឺ តែនឹងមើលថែគ្នា
- ដឹងថាមានអ្នកដទៃល្អជាង តែនឹងមានភក្តីភាពជាមួយគ្នា
- ដឹងថាមានគេផ្អែមជាង តែនឹងមិនក្បត់គ្នា
- ដឹងថាមិនមែនជាមនុស្សល្អឥតខ្ចោះ តែសុខចិត្តទទួលយកគ្រប់យ៉ាង។

អ្នកមានប្រពន្ធប្ដី សម័យហ្វេសប៊ុក
ឆាតលេងអផ្សុក ជាមួយគេផ្សេង
ឆាតយូរៗទៅ កើតចិត្តវង្វេង
ក្បត់ប្ដីប្រពន្ធឯង រត់រកអ្នកថ្មី។
គ្រួសារបានសុខ ត្រូវស្មោះភក្ដី
បើមានពីរបី បែកបាក់គ្រួសារ។
បើបែកគ្នាហើយ កូនរស់ឯកា
ព្រោះតែម៉ាក់ប៉ា មិនស្មោះត្រង់គ្នា។
សម័យទំនើប ប្រយ័ត្នគ្រាំគ្រា
ស្នេហ៍វេទនា ព្រោះតែហ្វេសប៊ុក។
មិត្តស្អាតសង្ហា ឆាតបំបាត់ទុក្ខ
គិតថាអផ្សុក បែរកើតលង់ចិត្ត។
បងអូនអូនបង យូរទៅភ្លេចគិត
បែកមានគំនិត ក្បត់ប្ដីប្រពន្ធ។
បើមានគូហើយ កុំចិត្តលោភលន់
ស្មោះប្ដីប្រពន្ធ ទើបមានមង្គល។
(និពន្ធដោយបុព្វបុរសខ្មែរ)

📖 អានទាំងអស់គ្នាកុំខាន
ខ្ញុំនឹងចែកនូវចំណេះដឹងនេះជារាងរាល់ឆ្នាំដើម្បីអោយប្រជាជន និង កូនខ្មែរ ទាំងអស់បានយល់ពីអត្ថន័យដែលចាស់បុរាណយើងបានធ្វើដោយបង្កប់អត្ថន័យយ៉ាងមានតម្លៃ :
#ទេវតា និង #កបិលមហាព្រហ្ម !
#តើកបិលមហាព្រហ្មតំណាងអោយអ្វី...?
+ហេតុអ្វីកបិលមហាព្រហ្មមានតែព្រះសិរដង្ហែរាល់ៗឆ្នាំដោយបុត្រី៧នាក់...?
+ហេតុអ្វីកូនកបិលមហាព្រហ្មមាន៧នាក់ហើយសុទ្ធតែស្រី...?

*កូនស្រី តំណាងនគរមេ នគរមាតាធិបតេយ្យ នគរដែលមានស្រ្ដីជាអ្នកបង្កើតរដ្ឋដំបូង ដែលគេតាំងនាមហៅថា (នាងនាគ) សត្វនាគ តំណាង ធាតុទឹក ត្រជាក់ ងងឹត ព្រះចន្ទ ទន់ មនុស្សស្រី នេះជាមូលហេតុ ដែលទេវតានៅស្រុកខ្មែរ សុទ្ធតែស្រី គ្មានប្រុស ឬ កូនកបិលមហាព្រហ្ម មានសុទ្ធតែស្រី។

៧នាក់ តំណាង ៧ថ្ងៃ ក្នុងមួយសប្ដាហ៍ ហេតុដូច្នេះហើយបានជា ចូលឆ្នាំប៉ះចំថ្ងៃណា កូនស្រីតំណាងថ្ងៃនោះ ចុះមកថែរក្សាដែនដី មកដង្ហែព្រះសិរកបិលមហាព្រហ្មដែលជាបិតា។ ឧ.ប្រសិនបើឆ្នាំនេះ ចំថ្ងៃអាទិត្យ កូនស្រីថ្ងៃអាទិត្យមក ប្រសិនបើឆ្នាំក្រោយចំថ្ងៃចន្ទ កូនស្រីថ្ងៃចន្ទមក ហើយប្រសិនបើឆ្នាំទី៣ ចំថ្ងៃចន្ទ គឺកូនស្រីថ្ងៃចន្ទមកម្ដងទៀត មិនមែនមកម្ដងម្នាក់នោះទេ ព្រោះកូនស្រីមិនមែនជាទេវតា មិនមែនជាមនុស្ស គឺតំណាងអោយថ្ងៃទាំង៧នៃសប្តាហ៍តែប៉ុណ្ណោះ។

*ព្រះសិរកបិលមហាព្រហ្ម តំណាងអោយព្រហ្មវិហារធម៌របស់មនុស្ស រួមមាន

- មេត្តា: សេចក្ដីរាប់រក, សេចក្ដីរាប់អានគ្នា, សេចក្ដីប្រណី, បំណងចង់ឲ្យអ្នកដទៃបានសេចក្ដីសុខ-ចម្រើនដូចខ្លួនដែរ

- ករុណា: សេចក្ដីអាណិត, អាសូរ;

- មុទិតា: ដំណើរមានចិត្តរីករាយទៅរកសេចក្ដីសុខរបស់អ្នកដទៃពុំរើសមុខ គឺដំណើរដែលដឹងថា អ្នកដទៃតាមតែអ្នកណាក៏ដោយ គេមានទ្រព្យធនបុណ្យស័ក្តិ បានប្រកបដោយសេចក្ដីសុខ-ចម្រើន ក៏មានចិត្តជួយអរគេ មិនច្រណែននិន្ទាឈ្នានីស

- ឧបេក្ខា: ការតាំងចិត្តជាកណ្ដាល, ដំណើរមិនលម្អៀងទៅខាងណា

មាតាបិតាមានមុខ៤ ជាព្រហ្មនៃកូន ជាអ្នកដឹកនាំកូនមន្រ្ដីរាជការមានមុខ៨ (៤លើ៤) ជាព្រហ្មនៃពលរដ្ឋ និង ព្រហ្ម នៃកូនខ្លួនឯង ជាអ្នកដឹកនាំពលរដ្ឋ និង ដឹកនាំកូនខ្លួនឯង។

ព្រះពុទ្ធមានមុខ១២ (៤ត្រួតគ្នា៣ដង) ជាព្រហ្មនៃសត្វលោក ជាព្រហ្មនៃពលរដ្ឋ ជាព្រហ្មនៃបុត្រាបុត្រី។

*ហេតុអ្វីពេលក្រវែង ព្រះសិរ កបិលមហាព្រហ្ម ដល់ដីឆេះដី ដល់សមុទ្ររីងសមុទ្រ ដល់អាកាស ឆេះអាកាស...?
*ន័យនេះ ប្រដូចទៅនឹងបុគ្គល ប្រសិនបើបោះបង់ព្រហ្មវិហារធម៌ ក្នុងខ្លួនចោលហើយ គឺអាចបង្កអោយលោកវិនាសបាន។
*មាតា បិតា បោះព្រហ្មចោល (លក់កូន រំលោភកូន)
មន្រ្ដីរាជការ បោះព្រហ្មចោល (ធ្វើបាបរាស្រ្ដ កេងទ្រព្យសម្បត្តិជាតិ)

#ធម្មបាលកុមារ ស្ដាប់សត្វឥន្រ្ទីនិយាយគ្នា ដឹងថា #សិរី៣ប្រការ៖
- សិរីទី ១ ពេលព្រឹក នៅត្រង់មុខ
- សិរីទី ២ ពេលថ្ងៃ នៅដើមទ្រូង
- សិរីទី ៣ ពេលយប់ នៅចុងជើង។
ធម្មបាលកុមារ ជាកុមារ ដែលមានចំណេះបញ្ញា ខាងផ្លូវធម៌យ៉ាងជ្រាលជ្រៅ អក្សរសិល្ប៍បង្កប់ន័យថា ស្ដាប់សត្វឥន្រ្ទីដោះប្រស្នា តែន័យពិតគឺ ធម្មបាលកុមារ
ប្រើឥន្រ្ទិយទាំង ៥ ក្នុងពោធិបក្ខេយធម៌ទាំង ៣៧ ដើម្បីដោះប្រស្នាធម៌ របស់កបិលមហាព្រហ្ម។
#ឥន្រ្ទិយទាំង៥រួមមាន:
ទី១ សទ្ធិន្រ្ទិយ សទ្ធាជាធំ
ទី២ វិរិយិន្រ្ទិយ វិរិយៈជាធំ (សេចក្ដីព្យាយាម)
ទី៣ សតិន្រ្ទិយ សតិជាធំ
ទី៤ សមាធិន្រ្ទិយ សមាធិជាធំ
ទី៥ បញ្ញិន្រ្ទិយ បញ្ញាជាធំ

*សិរីទី ១ នៅមុខ មានមាត់ជាធំ គឺ វចីសុចរិត
*សិរីទី ២ នៅទ្រូង មានចិត្តជាធំ គឺ មនោសុចរិក
*សិរីទី ៣ នៅជើង មានកាយជាធំ គឺ កាយសុចរិត
បុគ្គលណាប្រព្រឹត្តល្អទាំងកាយវាចាចិត្ត នោះនឹងទទួលបានសិរីសួស្ដីសុភមង្គលពេញមួយថ្ងៃ និង រាល់ៗថ្ងៃ ពុំមែនគ្រាន់តែយកទឹកលុបលាងមុខទ្រូងជើងមានសិរីសួស្ដីនោះឡើយ។

នេះជាន័យពិត អត្ថបដិរូប នៃអត្ថបទក្នុងន័យអក្សរសិល្ប៍ ក្នុងរឿងកបិលមហាព្រហ្ម។

អត្ថបទដោយ: លោក ឆន វិបុល

🥰😍🥰

📚✍️អត្ថបទល្អ៖ អ្នកគ្រូបង្រៀនម្នាក់ បានពិនិត្យកិច្ចការផ្ទះដែលធ្វើដោយសិស្សរបស់គាត់។ ប្តីរបស់គាត់កំពុងអង្គុយលេងហ្គេមដែលគាត់ចូលចិត្តក្នុងទូរស័ព្ទទំនើបរបស់គាត់។

ពេលអានកិច្ចការផ្ទះចុងក្រោយ ប្រពន្ធរបស់គាត់ចាប់ផ្ដើមយំខ្សឹបខ្សួល។

ប្ដីរបស់គាត់ក៏សួរថា៖ កើតអ្វីអូន?
ប្រពន្ធ៖ «ម្សិលមិញ ខ្ញុំបានដាក់កិច្ចការផ្ទះដល់សិស្សរបស់ខ្ញុំសរសេររៀបរាប់ពីប្រធានបទមួយគឺ “ បំណងប្រាថ្នារបស់ខ្ញុំ (My WISH)”។

ប្តី៖ "មើលទៅដូចមិនអីទេ ប៉ុន្តែហេតុអ្វីបានជាអូនយំ?"

ប្រពន្ធ៖ «ពេលពិនិត្យកិច្ចការចុងក្រោយនេះ បានធ្វើឲ្យខ្ញុំយំ»។

ប្ដីឆ្ងល់៖ «តើសរសេរពីអ្វី បានជាហេតុធ្វើឱ្យអូនយំ?

ប្រពន្ធ៖ ឥឡូវបងចាំស្តាប់......

បំណងប្រាថ្នារបស់ខ្ញុំគឺចង់ក្លាយជាទូរស័ព្ទទំនើប(ស្មាតហ្វូន)។
ប៉ាម៉ាក់ខ្ញុំស្រលាញ់ទូរស័ព្ទរបស់ពួកគាត់ខ្លាំងណាស់។

ពួកគាត់ខ្វល់ពីទូរស័ព្ទទំនើបរបស់គាត់ខ្លាំងពេក រហូតពេលខ្លះភ្លេចខ្វល់ពីខ្ញុំហើយ។
ពេលឪពុកខ្ញុំមកពីការិយាល័យហត់នឿយ គាត់មានពេលសម្រាប់ទូរស័ព្ទ ប៉ុន្តែមិនមានពេលសម្រាប់ខ្ញុំទេ។

នៅពេលដែលឪពុកម្តាយរបស់ខ្ញុំកំពុងធ្វើការងារសំខាន់ណាមួយ ហើយទូរស័ព្ទរបស់គាត់រោទិ៍ គាត់តែងលើក ឬ យកចិត្តទុកដាក់ពីទូរស័ព្ទ ប៉ុន្តែមិនយកចិត្តទុកដាក់ពីខ្ញុំទេ... ទោះបីជាខ្ញុំកំពុងយំក៏ដោយ។

គាត់លេងហ្គេមនៅលើទូរស័ព្ទរបស់គាត់ មិនមែនលេងជាមួយខ្ញុំទេ។

នៅពេលដែលពួកគេកំពុងនិយាយទូរស័ព្ទទៅកាន់នរណាម្នាក់គាត់តែងតែស្ដាប់គេ។ គាត់មិនស្តាប់ខ្ញុំសូម្បីតែខ្ញុំកំពុងប្រាប់គាត់ពីរឿងសំខាន់ណាមួយក៏ដោយ។

ដូច្នេះ បំណងប្រាថ្នារបស់ខ្ញុំគឺចង់ក្លាយជាទូរស័ព្ទស្មាតហ្វូន។

ក្រោយពីបានស្តាប់សំដីនោះ ប្តីខ្ញុំរំជួលចិត្តក៏សួរប្រពន្ធថា «អ្នកណាសរសេរនេះ?

ប្រពន្ធ៖ "កូនប្រុសរបស់យើង" ។

♦️♦️♦️
គូររូបដោយ ប្អូនស្រី រ៉ង ខន្តី Khantey Bunna 🌹👍