Chan Ey Ly

បើស្រលាញ់គេ ធ្វើឱ្យអ្នកបាត់បង់ភាពជាខ្លួនឯង ដូច្នេះគឺត្រូវត្រលប់មកស្រលាញ់ខ្លួនឯង និងរស់ជាខ្លួនឯងយ៉ាងពេញលេញដូចពីមុនវិញ ហើយក៏ទុកឱ្យគេរស់ជាគេវិញដូចដើមទៅ។ ការឈឺចាប់ដែលបាត់បង់គេ វានឹងបានប្រសើរឡើងម្ដងបន្ដិចៗដោយឆ្លងកាត់ពេលវេលា តែបើអ្នកត្រូវឈឺចាប់ដោយសារតែបាត់បង់ភាពជាខ្លួនឯង គឺវានឹងឈឺម្ដងបន្ដិចៗ ហើយចុងក្រោយ អ្នកមិនមែនគ្រាន់តែបាត់បង់ភាពជាខ្លួនឯងទាំងស្រុងទេ តែគេក៏នឹងបោះបង់អ្នកចោលដោយឥតស្ដាយស្រណោះឡើយ...! ដកស្រង់ចេញពីសៀវភៅ #ទម្រាំដឹងខ្លួនថាត្រូវការអ្វី 🍀🏡💙💞

#ពេលខ្លះក៏ត្រូវស្ងៀមស្ងាត់ម្ដង!

“ភាពស្ងៀមស្ងាត់ នៅពេលខ្លះវាមានតម្លៃជាងពាក្យ បរិយាយរៀបរាប់ដែលមិនអាចពន្យល់ឱ្យគេយល់បាន។ ការរក្សាបាននូវការចងចាំដ៏ស្ងៀមស្ងាត់វាប្រសើរជាងការដែលមានមនុស្សស្ដាប់ឮនូវអ្វីដែលយើងប្រាប់ ប៉ុន្តែគេមិនយល់អ្វីសោះ”

ទង្វើល្អរបស់យើង មិនអាចធ្វើឱ្យមនុស្សគ្រប់គ្នារំភើបទេ វាមិនអាចមានមនុស្សគ្រប់គ្នាមករំភើប អបអរសាទរ ត្រេកអរ ជាមួយអ្វីដែលយើងធ្វើនោះទេ។ មនុស្សខ្លះ នឹងពោលសរសើរយើង ដើម្បីទទួលបានប្រយោជន៍ពីយើងទៅ។ មនុស្សខ្លះទៀត បន្តលើកទឹកចិត្តដល់យើងឱ្យខិតខំប្រឹងប្រែង គេនិយាយចេញពីបេះដូងនៃក្ដីស្រឡាញ់ពិតៗ។ មនុស្សខ្លះទៀតក៏និយាយបំបាក់ទឹកចិត្តរបស់យើង។ មានមនុស្សដែលគាំទ្រយើង ប៉ុន្តែវាមិនដូចជាការពេញចិត្ត និងជឿជាក់ចំពោះខ្លួនឯងដែលយើងអាចធ្វើបាននោះឡើយ។ មានមនុស្សដែលជឿលើយើងប៉ុន្តែវានៅតែមិនដូចជំនឿចិត្តដែលយើងត្រូវមានចំពោះខ្លួនឯង។ មានមនុស្សដែលរិះគន់យើង ប៉ុន្តែវាមិនមែនជាចុងបញ្ចប់ទេ បើយើងបោះបង់ចោលខ្លួនឯង និងមិនព្រមកែប្រែកំហុសខ្លួនឯង ទើបវាគួរឱ្យខ្លាច។

នៅលើវិថីជីវិតរបស់យើងម្នាក់ៗ មិនថាភាពរីករាយ ឬសុភមង្គលដ៏ជ្រាលជ្រៅក្នុងជម្រៅចិត្ត ដែលយើងបង្កើត បាន វាគឺជាជម្រើសនៃជីវិតរបស់យើង។ បើយើងជ្រើសរើសគិតនិងរំលឹកពីរឿងអពមង្គលដែលយើងមិនចង់បាន មិនចង់ចួប មិនចង់ដឹង នោះវាប្រាកដណាស់ យើងនឹងគ្មានថ្ងៃសប្បាយចិត្តជាមួយលទ្ធផលរបស់ខ្លួនឯងទេ។ ថ្ងៃនេះមានមនុស្សពោលសរសើរខ្ញុំដើម្បីប្រយោជន៍!មានមនុស្សនិយាយរិះគន់ព្រោះការឈឺឆ្អាលចង់ឱ្យខ្ញុំបានល្អជាងមុន! មានមនុស្សដែលរិះគន់ហើយចូលរួមជួយខ្ញុំក្នុងការកែលំអ! ប៉ុន្តែវាក៏មានមនុស្សដែលគ្មានពាក្យសរសើរ គ្មានពាក្យកែលំអ និងមានត្រឹមតែពាក្យបំបាក់ទឹកចិត្តទាំងស្រុង។
គ្រប់គ្នាគិតបែបណា វាមិនមានអ្វីត្រូវឈឺក្បាលច្រើនទេ ប៉ុន្តែយើងសម្រេចចិត្តជ្រើសរើសការគិតចំពោះរឿងណាមួយ នោះជាអ្វីដែលយើងត្រូវទទួលស្គាល់ដោយខ្លួនឯង។ ខ្ញុំមិនអាចជ្រើសរើសស្ដាប់តែពាក្យណាដែលគិតចង់ស្ដាប់ទេ ប៉ុន្តែខ្ញុំអាចជ្រើសរើសថាគួរតែចងចាំរឿងណាច្រើនជាង។ ពេលខ្លះខ្ញុំគិតថាការស្ងៀមស្ងាត់ ការមិននិយាយតបត វាជារឿងល្អបំផុតហើយ។ខ្ញុំមិនចង់មានរឿងមិនសប្បាយចិត្តច្រើនជាង១០នាទីទេ ព្រោះវាខាតពេលវេលានៃជីវិតរស់នៅរបស់ខ្ញុំ។

-------------------------------------------------------

អត្ថបទដកស្រង់ចេញពីសៀវភៅ #កាដូជីវិត

🥰🦋

#ចាប់ផ្ដើមស្គាល់ពីតម្លៃរបស់ខ្លួនឯង
មានពេលខ្លះ រឿងដែលយើងអាចធ្វើបាន វាអាចមិនមែនជារឿងអស្ចារ្យទេក្នុងក្រសែភ្នែកមនុស្សគ្រប់គ្នា តែត្រឹមតែមាននរណាម្នាក់មានអារម្មណ៍ប្រសើរឡើងតាមរយៈទង្វើល្អរបស់យើង ក៏វាអាចធ្វើឱ្យយើងចាប់ផ្ដើមមើលឃើញពីតម្លៃនៃជីវិតរបស់ខ្លួនបានដែរ។ នៅក្នុងកាលៈទេសៈដែលយើងគិតថាលែងចង់រស់នៅបន្តទៀត តាមពិតវាគឺជាពេលវេលាមួយដែលយើងបានរកឃើញថាជីវិតយើងមានន័យបំផុតបន្ទាប់ពីឆ្លងកាត់ដំណាក់កាលនោះ។ ចិត្តដ៏តូចចង្អៀតរបស់មនុស្សយើង តែងគិតថាខ្លួនយើងគ្មានសេចក្ដីសុខ គ្មានសុភមង្គលគ្មានភាពកក់ក្ដៅ តែចិត្តដ៏ធំទូលាយរបស់យើងតែងតែគិតថា យើងមានអ្វីៗជាច្រើនដែលអាចផ្ដល់ឱ្យទៅមនុស្សដទៃដែលកំពុងខ្វះខាតជាងយើង។ មានមនុស្សលំបាកៗជាច្រើនដែលយើងត្រូវសម្លឹងមើលពួកគេដោយកែវភ្នែកដែលស្រោបដណ្ដប់ក្ដីស្រឡាញ់ និងក្ដីមេត្តាជ្រាលជ្រៅ។

ចេតនានៃចិត្តរបស់យើងដែលមានលើអ្នកដទៃ វាជាអ្នកកំណត់ពីសុភមង្គលក្នុងជីវិតខ្លួនឯងផ្ទាល់។ ប្រសិនបើយើងយកពេលឈឺចាប់របស់យើងមកធ្វើអ្វីម្យ៉ាងដើម្បីអ្នកដទៃ យកឱកាសនៃការរស់នៅដើម្បីបម្រើដល់អ្នកផ្សេង នោះយើងនឹងចាប់ផ្ដើមស្គាល់ពីតម្លៃរបស់ខ្លួនឯង។ ការពិត យើងមិនមែនគ្រាន់តែរស់នៅដើម្បីត្រូវការទេ ប៉ុន្តែយើងរស់នៅបាន ព្រោះយើងមានអារម្មណ៍ស្កប់ស្កល់នឹងអ្វីដែលយើងមាន ហើយលើសពីនេះគឺយើងមានអារម្មណ៍ថា យើងមានបរិបូណ៌ថែមទៀតផង។ អ្វីម្យ៉ាងដែលធ្វើឱ្យយើងទទួលបានអារម្មណ៍បែបនោះគឺក្ដីស្រឡាញ់។

------------------------------------------

អត្ថបទដកស្រង់ចេញពីសៀវភៅ #ផ្ដើមពីក្ដីសុបិន ស្នាដៃពី កូនចាបមាស
ចុចមើលស្នាដៃផ្សេងទៀតពីកូនចាបមាស https://bit.ly/3x9ZRAV

គេបោកឡើងអស់ចិត្ត🥺🦋