M.S.D

بعدين لما اتزوج حسمي ولدي ptosis عشان ينادوني ب apoptosis

من أكثر ال chapter المعقدة البشكي منه أي طالب في الحقل الطبي في ال basic physiology هو ال action potential نظرا لانه أساس الوظائف الحيوية ، في الحقيقة ال action potential = transport across cell membrane بالتالي اذا كنت فاهم النقل عبر غشاء الخلية م حيصعب عليك شيء .

مجال التخدير _Anesthesia❤️

انا ك زولة درست المجال وحسب تجربتي الخاصه بحاول اوصل الفكره عن المجال ..

📍أولا نظام الدراسه في معظم دول العالم بكون تخصص مباشر بمعنى أنو من البدايه بتكون شخص متتخصص ومع تطور البلد والعلم والتشعُبات ياهو جا التخصص دا ك واحد من المجالات اللي محتاجه شويه وقفه وإهتمام يعني التخصص دا شبه جديد فالبلد دي... التخدير ك مجال كويس شديد وشغلو (حساس) وظريف جداًجداً🔥

📍نجي للجزء الأهم _
طالب التخدير أو الشخص اللي حابب يدرس وأنت ركز معاي شديد.

🔸المجال دا في السودان فيو دبلوم و بكالريوس وتخصص بعد دراسه الطب.
الدبلوم دا موجود في أماكن وأكادميات صحيه مختلفه في الولايات والخرطوم... مدتو ثلاث سنوات وبجد بيطلعوا منو ناس كفاءات وأغلب الناس الشغاله دي دراسه دبلوم وشغالين من سنين طويله اقلاها ١٩٩٠ الدراسه بالعربي (حسب معرفتي من الناس اللي لاقيتهم لحد الآن ) ....

🔸نجي للبكلاريوس ودا موجود في أربعه جامعات فقط اثنين حكوميات (الجزيره _الزعيم الازهري) واثنين خاصات ( الرباط _مأمون حميده)بتدرس أربعه سنين وعلشان أنا درست بالرباط ف ح أضيف معلومه انو دراسته م صعبه خالص وماسهله... و ع فكره أنت في المستوي الأول بتدرس كميه مواد مختلفه بصوره عامه أساس ليك (التشريح وعلم الأحياء الدقيقه وظائف الأعضاء ....) وبعدها بتكون موادك كلها متخصصه وماف اي مجال غيرك بيدرسها بنفس عمقك ( علم الادويه، أجهزه ومعدات،تخدير وافاقه...)
و الدراسه بالإنجليزي طبعاً.
أما الجزء الثالث اللي هو درس طب وتنقل من عمومي الي نائب وبعدها تخصص بعد داك تخدير.

📍 حتواجهك مشكله ضخمه اللي هي المسمى الوظيفي..
وتتخرج بشنو؟؟
شوف ياعزيزي (رغم أنو انا شخصياً شايفه لو عندك هدف دي ماعقبه حتقيف في طريقك)
مُصطلح أخصائي يُطلق على الشخص اللي درس طب وخلص ومشي المشوار كامل واتخصص تخدير.
لما تدرس بكالريوس ح تتخرج ويتكتب في شهادتك اختصاصي ثاني تخدير
بالنسبه للجامعه والمميزات والعيوب أبشرك أنو مجتمع المخدرين مجتمع كويس شديد

📍خِتاماً:-
حابه اقول ليك:
أنت اللي ح تخت نفسك في المكان الأنت عايزو ، وعموماً بغض النظر عن موقعك مهما كنت ، طالما انت حابب المجال وحابب تكون من مجتمع التخدير والمخدرين.
"There is no surgery will take place without you, and the pain will not disappear without you".
(لا تُقام عمليه جراحيه بدونك ولن يختفي الألم إلا بك) .

🤩

طب الأسنان 💓

الليلة حنتكلم عن واحد من المجالات المرتبطة بالحقل الطبي وهو مجال مهم شديد وكمان واسع وبيشمل تخصصات كتيرة في داخله، والمجال دا كان مرتبط بكلية الطب وانفصل عنها مؤخراً _ نظراً لأهميته الشديدة _ وبقى مجال قائم بزاتو.
طب الأسنان "Dentistry" :❤️
⛔مدخل بسيط :
فن علاج الأسنان والفم والوجه والفكين، عندو تاريخ طويل وغني وممتع كمان، والتاريخ دا ممتد ابتداءً من عصور كان بيعتبر فيها ألم الأسنان كعقاب من الآلهة والقوى الشريرة التانية لحد ما اتحول لواحد من أكتر العلوم التقدمية في العالم❤️...
ممكن نقول انه طب الأسنان ما بدأ كعلم نظري بل بدأ بممارسات بدائية/عفوية، والحفريات المكتشفة في حضارات قديمة زي حضارة وادي الاندس وحضارة محراقة" الآن في باكستان" أثبتت وجود نوع من الممارسة لطب الأسنان، وفي العصور الظلامية في أوربا كان بيمارس بواسطة الحلاقين ، ايوه زي ما قريت الحلاقين نفسهم😂، وفي مصر القديمة كان يمارس بواسطة رجال الدين.
المهم طب الأسنان مر بأطوار ومراحل كتيرة شديدة لحد ما وصل لشكلو الحالي دا❤️..
_ الآن طب الأسنان يعرف بأنه :
"هو فرع من فروع الطب يتكون من دراسة وتشخيص ووقاية وعلاج أمراض واضطرابات وحالات تجويف الفم، عادةً في الأسنان (تطور وترتيب الأسنان) وكذلك الغشاء المخاطي الفموي والتركيبات والأنسجة المجاورة والمرتبطة بها، خاصة في منطقة الوجه والفكين." ..
كلية طب الأسنان عدد سنينها أقل شوية من الطب، ف بنلقى إنه دراسة البكالوريوس بتتطلب 5 سنين، وبالنسبة للدبلومات برضو في أنواع وبتتراوح فترتها ما بين سنتين لي 3 سنين.

⛔طيب يا دكتور المواد المفترض تدرسها في الكلية هي شنو؟! 🤩
في سنة أولى وسمستر ون تحديداً حتقرأ العلوم الطبيعية الأساسية زي الفيزياء والرياضيات والكيمياء والأحياء لكن دي حاجة بتختلف من جامعة لجامعة تانية، لأنو في جامعات بتبدأ تدرس المواد المرتبطة بالتخصص مباشرة.
"وبعدين حتنتقل لدراسة الأنتومي والفيسيولوجي والبيوكيميستري والسيرجري... إلخ "، لحد ما تنزل العيادة وتمارس براكتيكال وشغل بي نفسك 🤩، و وقت العيادات دا برضو بختلف من جامعة لتانية، في جامعات بتبدأ من المستوى التالت وفي جامعات من المستوى الرابع.
لكن الشي المهم إنك حتكون بتمارس وبتتدرب على الشغل حتى قبل ما تتخرج❤️.
⛔ وعموماً في الفترة دي من حياتك الأكاديمية حاول نظم زمنك وخليك زول بسأل كتيير، لازم تتسائل وتحاول تعرف أي شي، وبالمناسبة الدكاترة بحبو الزول يسألهم من أي حاجة عشان كدا حاول اقرأ وأعرف وما تفوت على نفسك أي حاجة يا دكتور. ..
⛔طيب بعد تتخرج في سنة اسمها "سنة الامتياز" ودي بتقضيها شغل في المستشفيات وبعد تنتهي بكون مصرح ليك رسمي تمارس المهنة كطبيب أسنان عمومي💯.
بالنسبة للتخصصات 🤩❤️ :
طب الأسنان بيتضمن حالياً بيتضمن 10 تخصصات متاحة للدراسة هنا في السودان و أهم التخصصات دي :
Prosthodontics "الاستعاضة الصناعية".
• Pediatric Dentistry "طب أسنان الأطفال".
• Periodontics "اللثة".
• Orthodontics "التقويم".
• Oral & Maxillofacial Surgery " جراحة الوجه والفم والفكين".

_ طيب هل في تخصصات تانية غير العشرة ديل؟!

ايوه في لكن ما متاحين حالياً هنا في السودان حالياً للأسف الشديد يعني، لكن ما معروف احتمال بعد 5 أو 6 سنين يكونوا متاحين 💯.

⛔طيب إنت بتتخصص في كم سنة؟ 🤩
دي حاجة برضو بتختلف من تخصص للتاني لكن عموماً فترة التخصصات بتتراوح من( 3_5 ) سنين...
⛔ الزمالة البريطانية والزمالة الأمريكية :
1_ الزمالة البريطانية وعندها 3 أقسام :
MFD _ MFDS. _ MJDF
_ وكل امتحان من التلاتة ديل عندو part 1 نظري، و part 2 عملي.
_ الإمتحان بكون في بريطانيا ومتوفر في بعض الدول العربية.
_ الفترة ما بين part 1&2 ما مفترض تزيد عن سنتين، وإذا زادت يعتبر كأنك ما امتحنت part 1 وحيكون لازم تعيدو تاني.
_ بالنسبة لامتحانات الزمالة البريطانية بتتطلب إنك تكون مخلص الامتياز.

2_ البورد الأمريكي :
بيتضمن امتحانين....
الأول NBDE (part 1&2)
أو التاني INBDE
والامتحان بيكون في أمريكا بس.
_ بالنسبة للإمتحان الأول NBDE (Part 1&2) ما ينفع الفترة بين part 1&2 تزيد عن سنتين، وفرص المحاولات فيو محدودة.
_ أما الامتحان التاني INBDE امتحان واحد بس وعدد محاولاته ما محدودة.
⛔ مهم شديد تمشو تبحثوا هسي عن الامتحانات دي وتعرفوا أي شي عنها، أنا اتكلمت عنها هنا بطريقة مختصرة بس. ..
⛔طيب إيجابيات طب الأسنان شنو؟ أو ليه أنا اقرأ طب أسنان؟
1_طبعاً عموماً الطب مهنة إنسانية، ومساعدة الناس دي حاجة ما ساهلة وفيها أجر كبير. ❤️
2_ الحاجة التانية إنه المجال دا من المجالات المتجددة والماشة في تطور كبير، سواء من ناحية علمية أو تكنولوجية.
3_ الحاجة التالتة القروش يا دكتور 😂💯، لكن القروش ما بتجي ساي لازم تتعب وتحاول تبني لنفسك cv كويس عشان تستند عليه بعدين.
4_ المنح الممكن تلقاها سواء لدراسة البكالوريوس أو التخصص بعدين متوفرة شديد، بس اغلبها بتطلب شهادة لغة (آيلتس _توفل) ودي ما حاجة صعبة بالمناسبة 😉
5_ طب الأسنان بعتمد على الجانب التطبيقي أكتر من النظري.
6_ وطبعاً ما ننسى الحصول على وظيفة مستقرة، بالإضافة للمكانة المجتمعية العالية والحصول على تقدير اجتماعي كويس.

⛔ طيب هل في سلبيات؟
1_ ما أظن ممكن نتكلم عن سلبيات دراسة طب الأسنان في السودان بدون ما نتطرق لمشكلة الامتياز.
طيب حالياً المتخرجين من البكالوريوس بنتظرو من (2_3) سنة عشان يقدروا يبدو الامتياز بتاعهم، طيب دا بسبب شنو وليه بنتظروا كتير كدا؟؟
بسبب الزيادة في الكليات البتخرج أطباء أسنان والنقص في المستشفيات الحكومية البتم فيها تحضير الامتياز. وحالياً ما معروف المشكلة دي حتتحل متين.
_ طيب الحل شنو؟؟ 🙂
الحل في السفر للخارج، بعد حصولك على شهادة البكالوريوس من الجامعة بتقدر تسافر مباشرة لمصر وتحضر فيها الامتياز بتاعك وتجي راجع🤩❤️.

2_ التعب والإرهاق، وفي الواقع أغلب مرضى الغضروف هم أطباء أسنان ودا بسبب الجلوس على نفس الوضعية لفترات زمنية طويلة.

3_ غير كدا ممكن تكون سنين البكالوريوس مع سنين التخصص طويلة شوية لبعض الناس.

4_ الشغل محتاج لزول يدو ثابتة وزول متمرس وبقدر يتعامل مع المشاكل ويديرها بطريقة جيدة💯، يعني بروف الدفعة ما هو أحسن دكتور أسنان.

_ لكن في النهاية ماف مجال ما فيو سلبيات وتحديات ومقدرتك على تجاوز التحديات دي مرتبط تماماً بمدى رغبتك في دراسة المجال المعين. ❤️
وفي الواقع الإيجابيات بتطغى على السلبيات، بل السلبيات ممكن تكون تحدي بالنسبة ليك عشان تقدر تطلع أحسن مقدراتك وتثبت إنك فعلاً قدر التحدي وتستحق تنال إسم طبيب أسنان ❤️.

وعموماً دا تقديم بسيط بس للمجال وبتمنى ما أكون اسهبت في عرض المعلومات ❤️
وبالتوفيق يا شباب ❤️💯

بقلم : د. عثمان 💓

مجال التمريض
Nursing

هو فن وعلم وإنسانية وهو إمداد المجتمع بخدمات معينة علاجية في طبيعتها تساعد على بقاء الفرد صحيحا، كما تمنع المضاعفات الناتجة عن الأمراض والأصابات.
هو أيضاً أحد التخصصات الطبية التي تعتني بصحة المريض والتخفيف من ألمه.

أهميته :-
من المجالات المهمه جداً حيث أنه حلقة الوسط في المجال الطبي، بل هو الممر الآمن لسلامة المرضى وتقديم الخدمات الطبية والنفسية لهم. فهو من يتلقى تعليمات الطبيب والصيدلي والمختبرات والعلاج الطبيعي. لتكتمل المنظومة الطبية من خلاله.

عدد سنين دراسته :-
أربعه سنوات اي ما يعادل" 8 فصول دراسيه"
لنيل درجة البكالوريوس.

مدى الحوجة له في سوق العمل :-
المجال مهم في كل أنحاء العالم ، وفرص العمل كبيره جداََ داخل السودان و خارجه و لا تقل أهمية عن الطبيب بل في بعض الأحيان قد تكون أهم من الطبيب بحد زاته.
التمريض حياه ، صحه ، رعايه ، انسانيه ، ومعرفه.
التمريض هو الفاصل بين حياة المريض وموته ، لذا الممرض هو من الأشخاص المهمين في المستشفى.

مثال لأحد أبرز روّاد المجال ( المشاهير ) :-
- رفيدة الأسلمية وقيل الأنصارية، وهى أول ممرضة في عهد الإسلام. كانت تمارض المصابين والجرحى في الحروب التي كان المسلمون طرفاً فيها.
- فلورنس نايتينجيل (1820–1910)، وهي رائدة التمريض الحديث.

مسار طالب التمريض أثناء الجامعة ( عدد السنين الأكاديمية وعدد السنين الإكلينكية) :-
مسار طالب التمريض يختلف من جامعة لأخرى.
ليس بالسهل أو الصعب إذا عمل الطالب توازن بين الحياة الجامعيه والمستشفى.
يمر على طالب التمريض ضغوطات وإجهاد أثناء دراسته وعمله ، فهو يحتاج للصبر وقوه التحمل ليستطيع أن يتقلب عليها ، لأن دوره مهم جداً في أي مكان يتواجد فيه سواء المستشفى أو أي مركز طبي آخر.
وعدد السنين الاكاديمية في الجامعة 4 سنوات لطالب البكالوريوس و سنتين للسنين الإكلينكية.

المواد التي يدرسها طالب التمريض :-
- علم التشريح والأعضاء
- الكيمياء الحيويه
- أساسيات التمريض
- علم الأمراض
- علم الاحياء المجهري
- الإسعافات الأولية
- علم الطب
- الطواريء والجراحة
- الغدد الصماء
- أمراض الشيخوخة
- أمراض الأطفال
- النساء والتوليد
- علم المجتمع
- الطب الشرعي
- والإدارة في التمريض وغيرها.هل في تدريب في المستشفى أثناء الدراسة بالجامعة :-
طبعا ، بالنسبة لطلاب تمريض فترة التدريب في المستشفى ببدأ من السنة الثانية.
وأغلب الجامعات عندها مستشفى خاص لتدريب الطلاب" مستشفى جامعي ".
بالاضافة لمستشفيات أخرى يتم التدريب فيها بواسطة خطاب من الجامعة لفترة معينة من الزمن.
فترة التدريب و إختيار المستشفى يتم على حسب مواد السمستر مثلا في المستوى الثانية عموما التدريب بتوجه بشكل خصوصي على تخصصات "التمريض الباطني و الجراحي" أما في المستوى الثالث فتختلف المواد ليتم التدرب في مستشفى لديه علاقة بي "تمريض النساء و التوليد و الأطفال"طط المستوى الرابع تكون هنالك قافلة و زيارات منزلية بحكم انو المواد منها "تمريض صحه المجتمع" .

مسار طبيب التمريض بعد التخرج من الجامعة والخيارات المتاحة له وأماكن العمل الممكنة :-
بعد التخرج هنالك الخدمه الوطنيه تأتي في المرحله الاولى مدتها ١٢ شهر يمر فيها خريج التمريض بكل التخصصات في المستشفى ، بعدها امتحان المهن الطبية ثم اختيار المستشفى للعمل هو خيار شخصي.
يمكن اختيار مركز صحي أو مجمع طبي أو عيادة خاصة أو حتى يمكن العمل في المجتمع كتخصص تمريض صحه المجتمع أو في المدارس ك ممرض/ة مدرسة " نادر في السودان".
عموما فرص العمل كثيرة و متوفرة و خريج التمريض لا يمكث بالسنوات يبحث عن العمل ، بل يمكن العمل فورا بعد التخرج و فرص العمل متوفرة بالخارج.

التخصصات المتاحة داخل مجال التمريض:-
هنالك تخصصات أساسية و من ثم كل تخصص يحتوى على تخصصات أخرى :
- التمريض الباطني و الجراحي
- تمريض النساء و التوليد
- تمريض الأطفال
- تمريض كبار السن
- تمريض صحه المجتمع
- تمريض الصحه النفسية
- التمريض العدلي " يهتم بالقضايا و الجرائم و مسارح الجرائم مثل الطب العدلي "
-تمريض أمراض النساء.
و تخصصات أخرى و في كل تخصص هناك خيارات متاحه و تخصصات أدق داخل كل تخصص.
مثلا التمريض الجراحي من الممكن لهذا التخصص أن يصبح تمريض جراحه القلب و في جراحه القلب "تخصص أوعية و شرايين" مثلا .

أكبر منظمة مسؤولة عن التمريض في العالم :-
لن استطيع الجزم لان هناك الكثير من المنظمات العالمية المهتمة بمجال التمريض مثلا WHO و NANDA ....

نصائح طالبة تمريض :-
تأكد تماماً إنك في أي مجال تدخلوا حتلقى ناس سلبين وكاسرين للمجاديف وحيتقال ليك كلام كتيير سلبي عشان تغير وجهتك أو تكره المجال.

أعرفُ أن التخصصاتِ التي حظيتُم بها قد لا توافق ميولكم، وقد لا تُشبه المكان الذي كنتم تُريدون أن تكونوا فيه، أعرفُ أن مسألة معدَّلاتِ القبول قد لا تُنصفكم ولا تُنصف مواهبَكم وكميَّةَ الشَّغفِ الموجودِ بداخلكم، ولكن ثقوا أنَّ الله يدبِّرُ لكم الأمرَ بطريقةٍ أجملَ مما تتصوَّرون، وأنَّ كلَّ شيءٍ يحدثُ لحكمةٍ خفيَّة، ولن تهِبنا الحياة أمورًا كاملةً كما نُريد، وأحيانًا تكون الخياراتُ السيِّئة بعينكم، هي الخيارات الأنسب لكم، اتركوا أمركم لله، وهو لن يخيبكم بإذنه. 🤍

حابا اتكلم عن حاجه مهمة في المجالات الطبيه سواء (طب طب اسنان صيدله مختبرات تمريض هندسة طبية ) اوغيرها من المجالات
بنلاقي كتير من الطلاب الممتحنين الواحد بحدد رغبتو هو عاوز اي تخصص من هو وصغير وبيكبر وبيكبر معاهو الطموح ده وف كتير منهم بتدخل نفس التخصص الهم عاوزنو وبكونو مبسوطين بيهو وببدعو ف مجالهم✅💜 اما الجزء التاني بدخل مجال من غيررغبه لظروف عديده منها م جاب النسبه الحيتاهل بيها للمجال ده او ظروف تانيه جبرتو انو يدخل المجال ده او مراعاة لظروف ناس بيتهم فمثلا زول رغبتو طب دخل صيدله او تمريض وطوالي بفكر يحول وانو هو م راضي بالمجال ده وشايف انو م حينجح فيهوو وكدا ومهمل دراستوو وبقرا بدون رغبه 💔
حابا اقول ليكم خلو ثقتكم في ربنا كبيررة واحسنوا الظن باللة سبحانه وتعالي لانوو انتو ف المكان المناسب بالضبط الحاجه الاختار ليك ربنا دي هي الحاجه الصاااح💛💛💛
بس انت عليك تبدع ف مجالك وتبحث فيهو وتبقى زول توووب في المجال الانتو فيهوو ده لانوو ربنا اذا م عارفك بتبدع في المجال ده م كان دخلتوو اصلااا
قال تعالي (وعسى ان تكرهو شيئا وهو خيرا لكم
#حب المجال الانت فيهو والاختارو ليك ربناا💛🌻

M.S.D

- هي اختصار ل - Medical synergism daily - حيث نشأت للتعريف بالمجال الطبي لمن هو مقبل على المرحلة الجامعية عبر التحدث عن كل مجال على حدة كما أيضا نشأت لشرح المواد وتبسيطها عبر مختلف الوسائل المقروءة والمصورة

- تحتوي الصفحة على العديد من المجالات الطبية - طب ، تمريض ، تخدير ، مختبرات ، طب أسنان ، صحة عامة - فهي تعمل على ربط الجامعه بالمستشفى وميدان العمل وذلك يكون عبر التحدث عن كيسات وكيفية إدارتها

- وتستهدف الصفحة كل الفئات الطلابية في مرحلة الثانوي والجامعة لتعريفهم بالتخصصات الطبية المختلفة عبر المنشورات في الميديا فلا يخفى علينا مدى تأثير الميديا علينا

- فمن الأهداف التي تنشدها الصفحة هو تبادل المنافع بين القارئ والناشر عبر حلقات النقاش الدورية في شكل كيسات لزيادة المخزون المعلوماتي

- وهي بذلك تنتهج رؤية اصلاحية تؤدي إلى ربط الطالب بالذكاء الاصطناعي الذي لا يخفى عنا اهميته اليوم .