Cabinet Dentaire Dr. Moukadem

باش ولدك و لا بنتك يركح كي تهزو لطبيب الاسنان..
1-ما تبداش عمرك الكل تخوف فيه بالطبيب و الزريقة و كي تهزو و يشوف رزيقة بالحق تقلو لا راهي ما توجعش و ما تخافش..
ماعادش تخوفو اولادكم بالطبة و الزرارق خاطر باش يجي نهار و تتحطو في الوضعية .. 👨‍⚕️👩‍⚕️
2- ما تقولش لصغيرك راو الطبيب باش يشوفك برك و مش باش يعملك شي باش تجيبو.. خاطر في اللخر باش يتداوى لازم نعملولو برشا حاجات و هكاكة ماعادش باش يصدقك و ماعادش باش يقبل العلاج..
3-موضوع المساومات راو مش حل👎.. تركح نشريلك حاجة.. تركح نعطيك فلوس.. ما تركحش مش ولدي.. ما تركحش نخليك و نمشي.. و الصغير يا ويلو من الطبيب لا ويليو من سنتو لا ويلو منك الي باش باش تخليه و تمشي.. حرفيا تحطيم نفسية ..
4- ما فماش حاجة اسمها شدو داويه بالسيف.. خاطر عادة العلاج يتطلب حصص و كي تشدو بالسيف حصة ماعادش باش يخليك ترجعو الحصة الي بعدها..
5- احكيولهم الحقيقة متع العلاج كيفاش و انو فما وجيعة صغيرة و فهموهم بالعقل و المنطق الي الطبيب حاجة لازمة..
6- كي تدخل مع ولدك ما تبداش خايف أكثر منو 🤣و سملا على ولدي.. اللطف على بنتي .. سايسو باللهي ..
راك هكاكة تزيد تصعب في المهمة.. كي يشوف بوه و لا امو خايفين (و الامهات خاصة)، الصغير مش باش يحس بالراحة و باش يخاف تلقائيا..
7- كان انتوما تخافو من طبة الاسنان ما تحكيوش قدام صغاركم و لو صغار في العمر على الحكاية هاذي.. خاطر آليا باش يحطها في بالو و باش يبدى خايف من قبل حتى ما يعرف الطبيب شنوا اصلا..
8- احكيولهم على الحاجات المزيانة في العيادات.. كرسي يطلع و يهبط كيما في ال manège و ضو كيما في المسرح.. و ماكينات صوتهم كيما الطيارة.. 🎡✈
9- اعطيوهم ثقة في رواحهم و ما تجيش قدام ولدك و تقول راو خواف و بيه و عليه .. تحطيم نفسية زادة هذا يتسمى..
10- حلقة السبوعي متع الفننن و طبيب الاسنان ما تخليهش يتفرج عليها 🙈😂
و اخيرا.. ما تتعاملوش مع صغاركم كصغار.. تكلمو معاهم كيما الكبار و ابنيولهم منطقهم بالصحيح و كونو صادقين معاهك و لو في الحاجات الى توجع..

De retour après 45 jours congé :)
Détartrage avant et après