Makeup Studio

افسوس گولڈ میڈل لینے والی لائبہ کا امریکی خواب فراڈ کی نذر۔۔۔
اسلام آباد سڑک کنارے پھندا لگی لاش کی صورت میں ملنے والی طالبہ لائبہ کی موت کے پیچھے ایک ایسی دردناک کہانی سامنے آئی ہے جس نے دل دہلا دیے۔
لائبہ نے انٹرنیشنل اسلامک یونیورسٹی اسلام آباد سے بی ایس گولڈ میڈل کے ساتھ مکمل کیا تھا۔ خواب بڑا تھا، ارادے مضبوط تھے اور منزل اعلیٰ تعلیم کے لیے بیرون ملک جانا تھی۔ لیکن اہلخانہ کے مطابق، امریکی یونیورسٹی میں داخلے کا خواب دکھانے والے ایک کنسلٹنٹ نے مبینہ طور پر اس خاندان سے 70 لاکھ روپے مانگ لیے۔
لائبہ کا والد موٹرسائیکل پر دودھ فروخت کرکے اپنے بچوں کو تعلیم دلوا رہا تھا۔ خود کرائے کے فلیٹ میں رہنے والے باپ نے بیٹی کے روشن مستقبل کے لیے اپنا پلاٹ تک بیچ دیا اور مبینہ فراڈ کرنے والے شخص کو 21 لاکھ روپے نقد دے دیے۔
اہلخانہ کے مطابق، باقی رقم کا انتظام کرنے کے لیے لائبہ کی والدہ کے زیورات بھی بینک میں رکھوا دیے گئے۔ ایک طرف بیٹی کے خواب پورے کرنے کی امید تھی، دوسری طرف والدین کی عمر بھر کی محنت اور قربانیوں کی جمع پونجی داؤ پر لگی تھی۔
لیکن جب لائبہ نے یونیورسٹی میں داخلے کے لیے فراہم کیے گئے دستاویزات کی تصدیق کروائی تو اہلخانہ کے مطابق، وہ سب جعلی نکلے۔
اس پوری کہانی کا سب سے دردناک پہلو وہ آخری پیغام ہے جو لائبہ نے اپنے ماموں کو بھیجا تھا۔
”میرے ساتھ ہونے والے فراڈ کا میرے والد کو نہ بتانا، وہ مر جائیں گے۔"
یہ الفاظ صرف ایک پیغام نہیں، ایک بیٹی کی اپنے باپ سے محبت اور اس کے دل پر پڑنے والے ممکنہ صدمے کا خوف بیان کرتے ہیں۔
آج سوال صرف لائبہ کی موت کا نہیں، بلکہ ان لوگوں کا بھی ہے جو بیرون ملک تعلیم کے خواب دکھا کر مبینہ طور پر خاندانوں کی جمع پونجی لوٹتے ہیں۔ کیا ایسے کنسلٹنٹس کی جانچ پڑتال کا کوئی مؤثر نظام موجود ہے؟

Makeup Studio .